Presidenti Meta nderon Luiza Gegën
Kreu i shtetit: Sportiste e përmasave botërore, është frymëzim për të gjithë
Presidenti i Repub likës z. Ilir Meta, vlerësoi ditën e djeshme me titullin “Mjeshtër i Madh” një nga sportistet më të shquara në të gjithë historinë e atletikës shqiptare. Bëhet fjalë për kampionen absolute, Luiza Gega. 31-vjeçarja dibrane i ka siguruar Shqipërisë shumë medalje të arta, duke bërë krenarë shumë shqiptarë anembanë botës. Në ceremoninë solemne të zhvilluar në ambientet e institucionit të kreut të shtetit, Presidenti Meta i dorëzoi titullin kampiones së atletikës shqiptare me motivacionin: “Për talentin, karakterin dhe profesionalizmin e treguar në arritjen e rezultateve të larta në sportin e atletikës në arenën kombëtare dhe ndërkombëtare, duke shpalosur vlera të mëdha si atlete e niveleve botërore, shembull frymëzimi për të gjithë sportistët e rinj e të reja”. Në fjalimin e tij, Presidenti Meta deklaroi: “E konsideroj një privilegj të nderoj sot një nga sportistet më të shquara në gjithë historinë e atletikës shqiptare, vrapuesen e jashtëzakonshme Luiza Gega. Ajo ka dhënë gjithçka për sportin që dashuron aq shumë, për atletikën. Luiza është një atlete e përmasave botërore. Si sportiste ka thyer rekorde, ka fituar në gara të rëndësishme ndërkombëtare dhe na ka frymëzuar të gjithëve me rezultatet e saj, në kampionatet botërore, europiane, ballkanike e lojërat mesdhetare. Luiza vazhdon të kontribuojë me performancën e saj, jo vetëm në rezultatet e larta kombëtare dhe ndërkombëtare, por me personalitetin e saj ajo është bërë një shembull i rritjes së identitetit dhe imazhit tonë kombëtar. Luiza është një nga ambasadoret më të mira të kombit tonë anembanë botës”, u shpreh kreu i shtetit, Ilir Meta.