Nga Milani te Roma, Napoli e Lacio, mesazhe sensibilizuese dhe llogari për donacionet
Bardhekaltrit dhurojnë dhe mbledhin ndihma
Situata e vështirë nga tërmetet në Shqipëri nuk ka kaluar pa u vënë re edhe në vendet e huaja. Shumë lojtarë apo figura të larta kanë dhënë mbështetjen e tyre për Shqipërinë, duke u solidarizuar për këtë që ndodhi. Për këtë moment të vështirë të shqiptarëve ka reaguar edhe një klub i madh, siç është Milani. Këta, nëpërmjet një postimi në rrjetet sociale, kanë dalë në mbështetje të shqiptarëve, duke thënë se duhet të qëndrojmë të fortë në këtë moment shumë të vështirë. "Në këto momente të vështira, mbështetja jonë është për vëllezërit dhe motrat tona në Shqipëri që u goditën nga një tërmet katastrofik. Qëndroni të fortë", shkruan klubi kuqezi. Legjendarët e Serisë A janë sensibilizuar me popullin shqiptar
NAPOLI - Tërmeti me epiqendër në Thumanë apo edhe pranë detit Adriatik është ndier edhe në Napoli. Siç raportohet në mediat italiane, lëkundjet janë ndier edhe përtej brigjeve të Adriatikut, në disa qytete italiane. Klubi i Napolit, pjesë e të cilit është edhe mbrojtësi i Kombëtares, Elseid Hysaj, ka reaguar dhe është solidarizuar për situatën e krijuar. "Jemi pranë popullit shqiptar të goditur gjatë natës nga një tërmet i rëndë", ka shkruar skuadra napolitane në profilin e saj në "Tëitter".
ROMA - Ekipi kryeqytetas italian ka qenë ndër ato që ka reaguar dhe shprehur solidaritetin në llogaritë zyrtare në rrjetet sociale. Roma, me anë të një postimi në "Tëitter", ka shprehur solidarizim. "Në këto orë të vështira i qëndrojmë pranë popullit shqiptar", ka shkruar skuadra e Romës. LACIO - Pas deklaratave mbështetëse të drejtorit Igli Tare, ka reaguar zyrtarisht edhe klubi i Lacios. Madje, bardhekaltrit kanë dhuruar fonde dhe gjithashtu kanë hapur një llogari bankare duke bërë thirrje që tifozët dhe mbështetësit e saj të kontribuonin për ndihma financiare në ndihmë të vendit tonë.