Magji e Dibalës, Paulo i fut ethet Simeones e... Rihanës
Atletiko KO, i duhet me çdo kusht fitorja me Lokomotivën
Mision i përm bushur! Juven tusi është matematikisht i pari në grup dhe mund të shkojë thjesht për shëtitje në Leverkusen, në ndeshjen e fundit. Misioni i përmbushur falë një Paulo Dibale në versionin "Maradona", i cili u dhuron suksesin bardhezinjve, me një goditje dënimi ekzemplare, spektakolare, nga një kënd zero, thuajse i pamundur, një goditje këndi pak metra më e shkurtër, e cila trondit themelet e Atletikos, e cila për të mos rrezikuar duhet të fitojë me çdo kusht ndeshjen e fundit kundër Lokomotivës së Moskës. Por nëse Atletiko nis të dridhet, drithërimat do ta kenë përshkuar edhe Rihanën, këngëtaren me famë botërore, e cila ishte prezente në stadium për të ndjekur skuadrën e saj të zemrës, Juventusin. Ndërkohë, në fushë u rikthye edhe Kristiano Ronaldo, por kopertina e ndeshjes i takon edhe njëherë tjetër numrit 10, i cili natën e djeshme realizoi golin e shtatë sezonal, i cili e bën edhe goleadorin më të mirë të skuadrës për momentin. Çfarë goli! - Balotazhin e përhershëm me Higuainin, mbrëmjen e djeshme e fitoi Dibala, një zgjedhje e saktë nga ana e trajnerit Mauricio Sarri, pasi numri 10 është thjesht i tërbuar: i pamarkueshëm, detyron Hermoson te kartoni i verdhë dhe vë në skenë gjithçka fantastike që repertori i tij përmban. Atletiko nga ana tjetër mbajti fillimisht në stol Zhoao Feliksin, me ish-in Morata dhe Vitolon nga minuta e parë. Gjithsesi, ish-juventini nuk është më ai lojtari i frikshëm në kundërsulm, siç mbahet mend në Torino, ndonëse edhe bardhezinjtë nga ana e tyre, vërtet e kontrolluan lojën, dominuan në zotërimin e topit, por deri në momentin e golit të Dibalës, që zhbllokoi ndeshjen, nuk kishin bërë asnjë goditje në portë. Fundja, edhe Ronaldo luftoi në çdo top, u vu në dispozicion të shokëve, por sërish nuk u pa në formën më të mirë, pas dëmtimit që vazhdon të vuajë në gju. Gjithsesi, Juventusi ka "armë" me shumicë për të "vrarë" ndeshjen, prandaj në minutën e dytë shtesë të pjesës së parë, është Dibala i cili me një goditje dënimi nga pozicion i pamundur dërgon topin në atë cep të portës, nën traversë, ku vetëm kampionët e mëdhenj si "Paulinjo" dinë ta dërgojnë. Një gol prej jashtëtokësori, që ekzalton "Allianz Stadium"-in, por në të njëjtën kohë i fut ethet Atletikos së Diego Pablo Simeones. Shtyllë dhe De Ligt - Në pjesën e dytë, Atletiko, e cila ka nevojë që të fitojë për t'u kualifikuar matematikisht, shtyn fort drejt sulmit, në kërkim të golit të barazimit. Trajneri Simeone vendos që të shtojë artilerinë në sulm, duke hedhur në fushë Zhoao Feliksin (dy goditje të rrezikshme dhe një asist magjik i pashfrytëzuar nga Korrea), në vend të Vitolos. Gjithsesi, rastin më të pastër për gol e krijoi Bernardeski (i zbritur në fushë në vend të Ramsejt), i cili godet shtyllën nga distanca në të 66-ën, por edhe Ronaldo pak sekonda më vonë frikëson, pas një kundërsulmi spektakolar. Në 15 minutat e fundit, te Juvja ka vend edhe për Higuainin, i cili merr vendimin e Dibalës. Për Gonzalon dhe Paulon i gjithë stadiumi çohet në këmbë, ndërsa edhe Sarri e pret me duartrokitje numrin 10. Por edhe pse e meritonte që ta kishte mbyllur ndeshjen në fushë, Dibala nuk xhindoset si Ronaldo, kthen përshëndetjen me trajnerin e tij dhe akomodohet në pankinë, mes duartrokitjeve dhe koreve falënderuese. Një moment magjik ky për yllin argjentinas, i cili u drodh në sekondat e fundit, ashtu sikurse i gjithë Juventusi, teksa panë Moratën që të mos arrinte te një asist, me portën e boshatisur. Gjithsesi, edhe sikur të kishte shënuar, ish-juventini do të kishte festuar më kot, pasi ndodhej në pozicion jashtë loje.