Lacio gjunjëzon Juven, thyen tabunë 16-vjeçare
CR7 nuk mjafton, Felipe, Milinkoviç-Saviç dhe Kaisedo shënuan edhe për... Interin
Jo vetëm dështoi në ten tativën për të rimarrë kreun, por Juventusi pëson në "Olimpiko" edhe humbjen e parë sezonale, pasi ishin të vetmit mes pesë ligave të mëdha të kontinentit, që këtë rezultat nuk e kishin njohur. Gjithsesi, shija e disfatës ishte edhe më e hidhur, teksa panë që avantazhi fillestar i Ronaldos të përmbysej nga golat e Felipes, Milinkoviç-Saviçit dhe Kaisedos. Ndeshja për "Zonjën e Vjetër" u kushtëzua mbi të gjitha nga një karton i kuq i Kuadrados, ndërsa Shezni nuk mjaftoi duke ndalur Imobilen nga pika e bardhë, madje pas një dopio-tentative. Dhe në fund, e gjithë festa është për Lacion, e cila theu një tabu historike, pasi nuk shijonte tri pikë ndaj Juves prej 16 vitesh në shtëpinë e saj.
CR7 DHE FELIPE
Kush tha që në Itali ka pak spektakël, dje do të ketë kërkuar falje, pasi dueli mes Lacios dhe Juves ishte elektrizues. Sarri bën mirë që zgjedh Dibalën, pasi ishte argjentinasi që lëshon shkëndijat e para në fushë, por Thomas Strakosha e fiton bindshëm duelin në distancë. Që në minutën e 10-të, portieri shqiptar i Lacios grushton një goditje të harkuar të numrit 10 bardhezi, por pak sekonda më vonë edhe një goditje këndi, që argjentinasi e lëshoi direkt në kuadratin e portës. Në të 15-ën Bernardeski nuk gjen kohën e saktë për të goditur me kokë pasimin perfekt të Ronaldos, por goli i merituar për Juven vjen dhjetë minuta më vonë, pas një aksioni perfekt: Dibala hap për Bentankurin, i cili pasi shkëmben shpejt me CR7-ën, ul siç duhet sferën dhe pason diagonalisht për portugezin që shënon me lehtësi. Strakosha nuk mund të bënte asgjë, ndonëse shqiptari do t'i mohojë dopietën personale yllit juventin, pas një goditjeje me kokë në të 43-ën. Pritja e "gardianit" i japin kurajë Lacios, e cila është shumë e frikshme në kundërsulm, por në 10 minutat e fundit vendosin që t'i fshehin topin Juves dhe në frymën e fundit gjejnë barazimin. Pasi Emre Xhan ndalon me vështirësi Leivan në vijën fundore, duke dhënë edhe iluzionin e një penalltie, aksioni që vazhdon nga goditja e këndit sheh Luis Alberton që të pikturojë krosimin perfekt për Luisin tjetër bardhekaltër, Felipen, i cili përpara Sheznit depoziton në rrjetë dhe skuadrat i drejtohen tunelit në paqe.
ÇMONTOHET JUVJA
Pjesa e dytë nis më agresive sesa e para, me të dyja ekipet që kërkojnë me ngulm golin e avantazhit, por pikërisht ky shfrenim në minutën e 66-të bën që Strakosha të rrezikojë katastrofën: nis një pasim të shpejtë për Açerbin, që sheh sferën t'i shpëtojë nga këmbët, topin e merr Dibala që godet, por shqiptari shlyen gabimin me një pritje prej superheroi.
Pak metra më majtas, Ronaldo nuk kërkon t'u besojë syve për egoizmin e shfaqur nga shoku i repartit, pasi nëse do pasonte, portugezi kishte mundësinë ta shtynte në rrjetë, me portën thuajse të boshatisur. Ndoshta ky episod kris diçka te Juventusi, por forcon Lacion, sepse në të 69ën e gjithë skuadra e Sarrit e lëshuar në zonën kryeqytetase kapet në befasi nga kundërsulmi i Laxarrit, por Kuadrado zgjedh ta ndalojë me një sparkatë. Në fillim arbitri Fabri zgjedh të verdhën, por pasi VAR-i e thërret korrigjon me të kuqen. Kaq mjafton dhe pesë minuta më vonë Lacio gjen golin që thyen tabunë 16vjeçare: pasim kirurgjikal prej 30 metrash i Luis Albertos, i cili gjen në zonë MilinkoviçSaviçin, që pason topin me shumë klas me të djathtën, godet saktë me të majtën. Juventusi dorëzohet këtu, të paktën
jo Shezni që ndal Imobilen nga pika e penalltisë (minuta e 79-të), por goli i tretë ishte thjesht çështje kohe, ndonëse ai do të vijë në sekondat finale, pas një tjetër kundërsulmi: Laxarri fillimisht sheh fluturimin e radhës nga Shezni, por Kaisedo me polakun e shtrirë në tokë e shtyn lehtësisht në rrjetë. Festa është e gjitha për lacialët, për Strakoshën me shokë, që mundën kampionët, shijuan fitoren e shtatë radhazi, thyen një tabu historike dhe blinduan vendin e tretë, duke shpresuar se ky do të jetë viti i artë për Champions-in.