Mile: Asnjë nënvlerësim Delvinës

Tomori ka bërë një galopim të fuqishëm javët e fundit të kampionatit, duke mundur edhe Albpetrolin rival në fushën e tij. Tashmë kreu është shumë afër dhe në Berat besojnë shumë se kthimi në Kategorinë e Parë është plotësisht i arritshëm në fund të këtij sezoni. Beratasit kanë zhvilluar dje seancën e fundit stërvitore para ndeshjes me Delvinën. Stafi teknik dhe futbollistët e Tomorit janë në pritje të fitores së radhës dhe për këtë janë përqendruar për të dhënë më të mirën në fushë. Forma optimale e skuadrës së Tomorit, pa as më të voglin dyshim, jep shpresë të madhe për një fitore të mundshme në takimin e sotëm përballë Delvinës, por trajneri Mile kërkon të lërë mënjanë çdo lloj euforie apo nënvlerësimi. Ai u ka bërë apel futbollistëve të tij që të qëndrojnë me "këmbë në tokë" në çdo moment dhe ta vlerësojnë kundërshtarin e radhës. Në një prononcim për "Panorama Sport", një ditë para ndeshjes, trajneri Kristaq Mile ka theksuar: "Asnjë nënvlerësim, jo vetëm ndaj Delvinës, por ndaj kundërshtarit, sepse ne thjesht duam të sillemi si profesionistë në fushë. Pak rëndësi ka emri i skuadrës kundërshtare. E vlerësoj maksimalisht Delvinën që ka një skuadër shumë cilësore dhe ndaj saj duhet dhënë maksimumi në fushë, sepse ndoshta fati mund të jetë me ne këtë javë, duke na ndihmuar për të marrë kreun e tabelës së renditjes. Gjithsesi, ne duhet të bëjmë së pari detyrën tonë". Trajneri beratas ka parasysh faktin seAlbpetroli rival, që kryeson me 2 pikë diferencë Grupin e Jugut, luan sot në transfertë me Skraparin dhe mund të lërë pikë. Beratasit janë gati të pasurojnë serinë e fitoreve sot në stadiumin e tyre.