Bonuçi bën sherr me Kuadradon, Sarri e justifikon: I kuq i tepruar
Ndodhi edhe me Atletikon, përsëri tension mes kapitenit dhe kolumbianit
Te Juventusi diçka nuk funksionon, por te Juventusi ndoshta diçka edhe mund të jetë krisur brenda dhomave të zhveshjes, edhe pse nuk ka asgjë që nuk zgjidhet nëse je një skuadër e madhe. Gjithsesi, ajo që ra në sy shumë natën e djeshme ishte edhe debati i nxehtë mes kapitenit Leonardo Bonuçit dhe Huan Kuadrados. Në momentin e kartonit të kuq nga ana e arbitrit Majkëll Fabri, anësori kolumbian ishte shumë i nervozuar me kryesorin e takimit, si rrjedhojë edhe e një ndërhyrjeje shumë të rëndë që ai kishte pësuar në pjesën e parë, por që "bilbili" nga Ravena la lejimin e lojës, edhe pse pamjet e përsëritura treguan se ndëhyrja në kavilje ishte shumë e ashpër. Gjithsesi, ajo që bëri jehonë në median italiane është fakti se mes Bonuçit dhe Kuadrados duket se gjakrat kanë kohë që janë nxehur, sepse në momentin që amerikano-jugori po protestonte, kapiteni i vuri dojën në gojë, por aty erdhi edhe një reagim shumë i ashpër, një goditje nga ana e Kuadrados ndaj mbrojtësit, që më pas u nda nga lojtarët e tjerë. Një skenë e tillë duket e përsëritur, duke qenë se edhe në tunel, pas ndeshjes së parë të fazës së grupeve, që Juventusi barazoi 2-2 ndaj Atletikos së Madridit, në Champions, kishte pasur shkëndija mes Bonuçit dhe
Kuadrados dhe pa dyshim që ky tension i përsëritur lë një enigmë të madhe për t'u mësuar më konkretisht.
Flet Sarri - Por derisa investigimi i medias italiane të bëjë punën e vet, trajneri i Juventusit, Mauricio Sarri, i del në mbrojtje Kuadrados. "Mu duk shumë i tepruar ai karton i kuq ndaj Huanit. Nuk besoj se ekzistonin limitet për përjashtimin e tij, duke parë edhe se topi po shkonte drejt vijës anësore dhe nuk mendoj se ishte një rast i pastër për gol, që duhej të meritonte të kuqin. Më vjen keq, sepse pikërisht ky episod ishte ai që kushtëzoi ndeshjen, por edhe disa të tjerë, ndonëse nuk është e rëndësishme. Edhe pse rezultati është tepër negativ, nota pozitive e ndeshjes është forma në rritje e ekipit. Pashë të gjithë që të vraponin më shumë. Mes tyre edhe Ronaldon, i cili më në fund ka nisur që të stërvitet me regjim të plotë dhe kjo u pa qartë në fushë. Ajo që gjithashtu shpresoj është që Bentankur të mos ketë asgjë serioze, edhe pse e vërteta është që nuk jemi shumë optimistë mbi dëmtimin e tij. Madje, dalja e Bentankurit nga fusha na bëri që të humbnim shumë terren, sepse për momentin, Rodrigo është jetik për sistemin tonë të lojës", u shpreh trajneri bardhezi.