Pep: S’mund të dorëzohemi
“S’është momenti për të menduar për Liverpulin, kam skuadër fantastike”
Tridhjetë e dy pikë pas 16 javësh. Pep Guardiola është duke regjistruar në kampionat sezonin e tij më të dobët të karrierës. Kurrë më parë tekniku katalanas nuk ka pasur kaq pak pikë në këtë fazë të sezonit. “Humbëm 1-2, por unë do ta uroja skuadrën time. Futbollistët e mi ishin fantastikë, ne jemi një ekip fantastik”, ishin fjalët e para të trajnerit të “Qytetarëve”. “Ata janë shumë të shpejtë, tmerrësisht të shpejtë dhe ndonjëherë kur humbet topin, është më e vështirë. Ne u përpoqëm, shkuam shumë herë në 1/3at e fundit të fushës, ndoshta më shumë se zakonisht”, shtoi Guardiola, i cili pyetjes nëse gara për titull mund të quhet e përfunduar tani që Liverpuli është 14 përpara, i përgjigjet kështu: “Ne duhet të përpiqemi të vazhdojmë. Ka shumë gjëra për të vazhduar dhe luftuar. Është e vështirë, sepse kundërshtari është në një seri të pabesueshme fitoresh, 15 nga 16 ndeshje deri tani. Ne pësuam trekatër kundërsulme në pjesën e parë dhe ata ishin cinikë, por unë jam më shumë se i gëzuar për paraqitjen tonë. Ushtruam presion ndaj tyre dhe krijuam raste. Në përgjithësi jam i kënaqur me lojën. Asnjë keqardhje. Unë e di se çfarë skuadre jemi. Jam i kënaqur që punoj me këta djem. U përpoqëm në pjesën e dytë. Fatkeqësisht shënuam vonë dhe nuk mund ta kthenim rezultatin. Nuk është koha për të
menduar për titullin kampion. Duhet të mendojmë për atë që duhet të bëjmë dhe mendojmë për ndeshjen e radhës. Nuk ka rëndësi nëse diferenca është gjashtë, tetë apo katërmbëdhjetë pikë, ne duhet të vazhdojmë. Jemi një skuadër fantastike”. Në
lidhje me thirrjet raciste ndaj Fredit, tekniku i Mançester Sitit e dënoi ngjarjen: “Sigurisht që nuk është e pranueshme. Klubi është duke përgatitur një deklaratë për ta dënuar incidentin dhe unë e mbështes atë”.