Solskjaer: Nuk do ta harrojmë se si e mundëm ekipin më të fortë në botë
Që kur është ulur në stolin e Mançester Junajtidit, Ole Gunar Solskjaer zor se ka parë një paraqitje më shpërthyese të “Djajve” të tij se ky derbi. “Do ta kujtojmë këtë. Dukeshim shumë të rrezikshëm kur merrnim topin dhe niseshim ndoshta kundër skuadrës më të fortë në botë. Ata janë një ekip i pabesueshëm dhe të marrësh një rezultat dhe të mbrohesh siç ne bëmë, duke krijuar edhe aq shumë raste... duhet të kishim shënuar tre apo katër gola më shumë, por kjo nuk ndodhi prej ndërhyrjeve të mira të portierit. Është e vështirë t’ua shkëputësh topin atyre. Ata mund të të lodhin për vdekje, por me shpejtësinë dhe kërcënimin që kemi, ne ishim të rrezikshëm sa herë sulmonim. Nuk ka rëndësi ku e fiton topin, e rëndësishme është të jesh pozitiv kur e ke atë”, deklaroi trajneri i Junajtidit, i cili u thur elozhe edhe emrave të veçantë: “Ajo që ra në sy ishte forma e skuadrës. Individualisht ata duhet të rivalizonin me disa prej futbollistëve më të mirë në botë. Kjo është pjesë e lojës. Është një natë e paharrueshme për Aron Uan-Bisakën, i cili ka qenë i pabesueshëm që kur ka ardhur në klub. Kur ti mbron shumë mirë, ndihesh i zhgënjyer që pëson nga një goditje këndi, diçka që nuk është pika e tyre më e fortë, por unë nuk mund të ankohem shumë. David De Gea është portieri më i mirë në botë. Ne prisnim standarde të larta prej tij dhe ai po rikthehet në formën e tij më të mirë”. Pastaj edhe një koment ndaj fyerjeve raciste ndaj Fredit: “I pashë në video, ishte për Lingardin e Fredin dhe atij tifozi duhet t’i vijë turp nga vetja. Është e papranueshme dhe unë shpresoj që ai të mos lejohet të shohë më futboll në stadium”.