Disiplina, gjobë Partizanit dhe Tiranës

Klubet duhet të zhdëmtojnë dëmet në impiant

Partizani dhe Tirana luajtën për herë të parë në një stadium me prani të tillë njerëzish, të paktën në mijëvjeçarin e ri. Rreth 19.000 persona ishin të pranishëm në ndeshjen e së premtes në stadiumin e ri kombëtar, në përfundim të së cilës pati edhe dëmtime të ndryshme në sektorët respektivë të tifozëve ultras. Për këtë, dje janë publikuar edhe ndëshkimet që kanë pësuar të dyja ekipet e kryeqytetit nga Komisioni i Disiplinës, kryesisht për sjelljen e tifozërive respektive.

Disiplina - Partizani dhe Tirana janë gjobitur njësoj nga Komisioni i Disiplinës pas sjelljes së tifozërive në stadiumin e ri kombëtar gjatë zhvillimit të ndeshjes derbi, e vlefshme për javën e 15të. Për të dyja klubet ka nga një vendim të ngjashëm: Gjobë në masën dy milionë lekë (të vjetër) si dhe urdhër për të zhdëmtuar dëmet e shkaktuara.

Vendimet - Ja vendimet e djeshme të Komisionit të Disiplinës për të dyja ekipet e kryeqytetit. "1- KF Partizani, për sjellje të gabuar të spektatorëve dënohet me gjobë në masën 200.000 (dyqind mijë) lekë (të rinj). KF Partizani detyrohet të dëmshpërblejë dëmtimet e shkaktuara në 'Air Albania Stadium' nga tifozëria përkatëse sipas aktkonstatimit të 'Qendrës Sportive Kuq e Zi'.

2- KF Tirana për sjellje të gabuar të spektatorëve dënohet me gjobë në masën 200.000 (dyqind mijë) lekë (të rinj).

KF Tirana detyrohet të dëmshpërblejë dëmtimet e shkaktuara në 'Air Albania Stadium' nga tifozëria përkatëse sipas aktkonstatimit të 'Qendrës Sportive Kuq e Zi'", ka vendosur Komisioni i Disiplinës.