Tirana, mungesat diktojnë 11-shen
Erando Karabeci rikthehet nga minuta e parë, Muçi pritet të debutojë si titullar
Tirana ka vijuar për gatitjet për ndeshjen e radhës. Nesër vjen Flamurtari në "Selman Stërmasi", në orën 16:00 dhe për të besuarit e Egbosë kjo ndeshje do të tentohet me çdo kusht që të fitohet. Si për të konfirmuar formën në derbi, edhe për të shfrytëzuar momentin e ekipit dhe mbi të gjitha edhe për vetë vështirësitë e kundërshtarit, 3 pikët do të tentohen me çdo kusht. Përballë tifozërisë së vet, Tirana do të synojë që të shkojë drejt Laçit në fundjavë me moralin maksimal dhe gjashtë pikë nga dy përballjet e fundit.
PËRGATITJET
E veçanta e stërvitjeve në këtë periudhë është fakti se Emanuel Egbo fokusohet dhe drejton pjesën e skuadrës dhe jo portierët, siç bën zakonisht. Për këtë gjë, Ilion Lika është ai që drejton seancat e portierëve te Tirana. Sigurisht që me eksperiencën që ka, Lika mund të bëjë fare mirë rolin e liderit në fushën e lojës, por edhe të një ndihmësi të mirëfilltë të trajnerit, sidomos për asketin e stërvitjes së portierëve. Pjesa tjetër e lojtarëve janë vënë nën drejtimin e Egbosë dhe përgatitësit atletik. Çdo ushtrim i kronometruar, në mënyrë që futbollistët të marrin një ngarkesë specifike dhe të përllogaritur, meqenëse ndeshja e radhës është shumë afër: nesër në 16:00. Në kompleksin "Skënder Halili", bardheblutë dje u dhanë dorën e fundit përgatitjeve me karakter fizik dhe sot, do të ketë një seancë të fundit që të definojë edhe formacionin dhe lëvizjet taktike të 11shes që do të zbresë nesër në fushën e lojës.
MUNGESAT
Tirana do të ketë pesë mungesa të sigurta në sfidën me Flamurtarin. Kështu, do të mungojnë për arsye kartonësh, Majkëll Ngo dhe Jurgen Çelhaka, por edhe Uinful Kobina. Dy të parët me kartonë të verdhë, ndërsa Kobina do të vuajë kartonin e kuq në minutat shtesë ndaj Partizanit. Jashtë për arsye dëmtimi do të jenë edhe Edon Hasani e Ismael Dunga. Të dy lojtarët e kanë mbyllur vitin dhe kthehen në janar. Pjesa tjetër e skuadrës është e gatshme për të luajtur të mërkurën ndaj Flamurtarit. Kujtojmë se Tirana ka humbur dy pikë në ndeshjen e parë në Vlorë dhe nuk duhet të gabojë, për më tepër pas fitores në derbi që erdhi pas gati gjashtë vitesh.
FORMACIONI
Tirana do të luajë nesër ndaj Flamurtarit, skuadër e cila në fazën e parë e barazoi në minutat shtesë 2-2. Këtë herë, Egbo do të duhet të bëjë llogaritë pa shumë lojtarë të rëndësishëm, të cilët edhe kanë qenë titullarë. Në një farë mënyre, formacioni do të diktohet jo pak nga mungesat. Mirëpo, nëse sheh organikën e bardhebluve, sërish ofrohen mundësi të arta. Futbollistë me eksperiencë, që i kanë dhënë shumë skuadrës dhe që fare lehtë llogariten si titullarë. Erando Karabeci është një prej tyre. Apo edhe Kale apo Muçi. Në portë pritet Lika dhe para tij, me gjasë, katërshja që luajti në derbi. Doka, Vangjeli, Muça e Hoxhallari kanë pak gjasa që të ndryshohen, edhe pse duhen përmendur që secili prej tyre ka nga një të mundshëm si alternativë për të luajtur (Kërçiku, Osmani, Imami dhe Ismajlgeci). Në mesfushë, pritet rikthimi i Erando Karabecit nga minuta e parë. Me gjasë, skema mund të jetë me të njëjtën vendosje si ndaj Partizanit dhe përkrah tij mund të luajë Batha. Përpara, në manovrën sulmuese në dispozicion të Egbosë janë Halili, Torasa dhe Kale. Të tre, në mbështetje të Ernest Muçit, i cili mund të ketë shanset që të startojë si titullar, për herë të parë këtë sezon në kampionat (mungojnë Ngo dhe Dunga). Nën rreshtimin 4-2-3-1, bardheblutë mund të kërkojnë një tjetër sukses si ai i ndeshjes së fundit ndaj Partizanit. Këtë herë, ndaj Flamurtarit për të shfrytëzuar edhe vështirësitë e ekipit vlonjat.