Koincidencë fatale, Luftëtari e mbyll vitin pa trajner

Novi pezullohet nga Disiplina, "spaletat" i merr Kristidhi

Luftëtari pas largimit të trajnerit grek Jorgo Marantas prej dy ditësh është duke u drejtuar nga Neritan Novi. Për bluzinjtë ndeshja e nesërme me Skënderbeun është provë force për vetë pozitën e rënduar të gjirokastritëve në klasifikim. E kur pritej që ndihmësi i Marantasit, Neritan Novi, të drejtonte Luftëtarin në dy sfidat e mbetura të vitit 2019, si "rrufe në qiell të hapur" vjen pezullimi nga Komisioni i Disiplinës. Dënimi me dy ndeshje do i privojë të drejtën e uljes në stol Novit, pavarësisht "bekimit" që mori nga presidenca e Luftëtarit pas "divorcit" me trajnerin Jorgo Marantas. Të befasuar nga ky lajm, Luftëtari nesër, si dhe në ndeshjen mbyllëse të vitit aktual, në pankinë do prezantohet nga përgatitësi i portierëve, Dritan Kristidhi, i cili ka licencën "UEFA Pro", për më tepër është pjesë edhe e stafit të Kombëtares U-17.

Para se bluzinjtë të startonin përgatitjet për ndeshjen e nesërme, janë vizituar nga ishtrajneri Marantas. Greku 46-vjeçar mblodhi në formë gjysmë hëne skuadrën që e drejtoi për 12 javë, me të cilën "arkivoi" 1 fitore, 5 barazime dhe 6 humbje për t'u ndarë përfundimisht. Nga sa u mësua, Marantas pasi ka shprehur

mirënjohje për bashkëpunimin me klubin e Luftëtarit dhe veçanërisht me grupin, mes të tjerave ka thënë. "Pavarësisht rezultateve që arritëm bashkë, unë ju vlerësoj dhe ndihem mirë. Kemi punuar të gjithë për një qëllim, por ky është futbolli. Ju jeni lojtarë të rinj dhe e keni

karrierën përpara. Punoni për veten tuaj, punoni për Luftëtarin, të cilin e kam dashur dhe do ta dua gjithmonë". Pas ndarjes me shtrëngime duarsh me lojtarët, Marantas është përqafuar me stafin teknik, teksa i ka uruar punë të mbarë dhe suksese.