Interi short me fat, Zaneti: Duam trofeun
Zv.presidenti: Mos snobojmë turneun, luftojmë në dy fronte
Do jetë një sfidë unike ajo që do shohë për ballë Interin dhe Ludogoretsin, në 1/16-at e Ligës së Europës. Vajtja do të luhet më 20 shkurt në Razgrad, në "Ludogorets Arena"; kthimi më 27 shkurt, në "San Siro". Pavarësisht eliminimit nga faza e grupeve të Ligës së Kampionëve, kompeticioni europian ku zikaltrit do të marrin pjesë mbetet i klasit të parë. I ka shkuar mirë skuadrës së Antonio Kontes, që ka "peshkuar" një kundërshtar të përballueshëm.
BULLGARËT - Interi pra do të përballet me një formacion bullgar, ekip nga Razgrad, qytezë prej 54 mijë banorësh. Ka fituar 8 herë kampionatin përveçse 2 Kupa të Bullgarisë dhe një Superkupë. Aktualisht komandon në Prava Liga me 5 pikë avantazh mbi Levski Sofien, ende i pamposhtur pas 20 javësh. Në Ligën e Europës mbylli në vendin e dytë Grupin H pas krahëve të Espanjolit, përpara Ferencvaroshit dhe Cska-së së Moskës.
ZANETI - Prezent në shortin e Nionit nga delegacioni interist ishte zv.presidenti Havier Zaneti. I cili u ndal për mikrofonat e "Sky Sport" për një analizë: "Nuk ka ndeshje të lehta në këto kompeticione. Duhet t'i përgatisim dhe t'i përballojmë në mënyrën më të mirë. Varet edhe nga forma e skuadrës. Tani duhet të mendojmë vetëm për kampionatin, do ketë kohë për këto dy sfida. Liga e Europës është një kompeticion ku duam të jemi protagonistë. Na vjen keq për mënyrën si dolëm nga Champions-i, për nga mënyra se si e interpretuam grupin, ishte mëkat. Fusha në ndeshjen e fundit tha se nuk mund të shkonim përpara, por është e kaluara. Duhet të përqendrohemi te kampionati dhe Liga e Europës: të shndërrohen në objektivë, në Europë do kërkojmë të arrijmë finalen. Mund të konkurrojmë në dy fronte, por nevojitet të llogarisim edhe dëmtimet që na kanë penalizuar. Ne favoritë. Historia jonë flet qartë:. Kemi qenë gjithmonë protagonistë në çdo turne". Disa fjalë edhe për trajnerin: "Konte? Jemi të lumtur. Të shikosh nga pranë mënyrën se si punon, pasionin e tij, si i përgatit ndeshjet, kulturën e punës... Është shumë e rëndësishme për një skuadër të madhe që po përpiqet të rikthehet në maja. Antonio është i përgatitur, inteligjent dhe me personalitet: është vetëm fillimi i një projekti, jemi në rrugën e duhur". Lidhur me problemet e zëvendësimeve: "Për të përballuar dy kompeticione do na duhen të gjithë, shembulli është Borha Valero: ka luajtur shumë pak, por po tregohet i besueshëm. Është e rëndësishme që të gjithë të ndihen të rëndësishëm. Për të arritur objektivat e mëdhenj, duhet të sillemi si grup".