Kusovaç, një gjigant si dhuratë për Vllazninë
Flet Peteri: Do i shpërblej me trofe tifozët tanë
Vllaznia në basket boll për meshkuj ka bërë një përforcim tepër të rëndësishëm në skuadër duke sjellë një lojtar cilësor në radhët e saj. Bëhet fjalë për Peter Kusovaç, i vlerësuar si lojtari më i mirë në kampionatin e fundit në Slloveni ndërsa është aktivizuar edhe në Malin e Zi, duke qenë gjithashtu një ndër më të spikaturit. Në prezantimin e bërë dje, siç e meriton një lojtar i kalibrit të tillë, vetë Kusovaç shprehet se ka ardhur në Shkodër për titullin kampion me Vllazninë. FLET KUSOVAÇ
“Kam dëgjuar shumë për Vllazninë se është një nga skuadrat më të mira në Shqipëri, ka fituar trofe vitet e fundit dhe ka rezultuar një ekip i suksesshëm. Di që skuadra merr pjesë në Ligën Ballkanike dhe kjo është gjë e mirë. Kam ardhur me shumë dëshirë këtu sepse ajo që dua unë është që bashkë me skuadrën të fitojmë titullin kampion dhe besoj se do t’ia arrijmë nëse japim maksimumin. Unë kam qenë shok skuadre me ish-lojtarin e Vllaznisë, Gjokoviç dhe ai më ka treguar se si funksionojnë gjërat në Shkodër dhe te Vllaznia. Di që ka tifozë të mrekullueshëm dhe kjo është gjëja më e rëndësishme për një skuadër. Jam shumë i lumtur që ndodhem te Vllaznia dhe shpresoj që të jap më të mirën time, për të arritur objektivat tanë. Do vazhdoj të punoj shumë fort në mënyrë që të justifikoj besimin e atyre që më sollën në një ekip si Vllaznia”, ishin fjalët e para të basketbollistit 26-vjeçar, prej 203 centimetrash.
PRESIDENTI XHAFERRI Numri një i Vllaznisë, Alban
Xhaferri, tha se ardhja e Kusovaç e përforcon tepër Vllazninë ndërsa bëri të ditur se pas Nick Evans është larguar edhe amerikani tjetër Hudson dhe se po shihet mundësia për të sjellë lojtarë të tjerë. “Prezantojmë te Vllaznia lojtarin e sapoardhur Peter Kusovaç. Është një lojtar shumë i rëndësishëm për ne dhe jam i lumtur që arritëm të kemi shërbimet e këtij basketbollisti. Besoj se tashmë kemi bërë goditjen e duhur për objektivat që ne kemi, siç është fitimi i titullit kampion. Tashmë skuadra ka nisur që të riformatohet dhe besoj se do të kemi rezultate edhe më pozitive në pjesën e dytë të këtij sezoni. Peter Kusovaç është një basketbollist me cilësi shumë të mira. Në fakt, ka qenë legjenda e basketbollit shkodran, Bledar Gjeçaj, ai që na e ka sugjeruar dhe madje ka këmbëngulur te ne që ta kemi në ekip sepse është një
lojtar cilësor dhe e njeh, ndaj u arrit edhe kjo marrëveshje. Pas largimit të Nik Evans ne kemi mbyllur kontratën edhe me amerikanin tjetër, Hadson dhe kështu ekipi është në një fazë rikonstruksioni. Në vazhdimësi do të shohim mundësinë e ardhjes së lojtarëve të tjerë në mënyrë që të realizojmë për fitimin e titullit. Situata jonë është e mirë dhe mund t’ia dalim. Kusovaç është një dhuratë për tifozët e Vllaznisë për festat e fundvitit, pasi ata na kanë mbështetur pa fund dhe i falënderoj e shpresoj të mos i zhgënjejmë. Në fund dua të uroj besimtarët e krishterë gëzuar festën e Krishtlindjes”, ishte fjala e presidentit të klubit kuqezi. Në vazhdimësi te Vllaznia në basketboll për meshkuj priten edhe disa ndryshime të tjera në grupin e lojtarëve, qoftë në afrime, ashtu sikurse në largime.