Blerja e re po çorodit kuqezinjtë, “cunami” në skemat e trajnerit
Suedezi imponon zgjedhjet, Pioli me dhimbje koke
Të gjithë për Ibrën, por Ibra nuk është për të gjithë. Megjithëse 38 vjeç, të ruash ritmin e suedezit është e vështirë dhe kërkon njohje të thella tekniko-taktike. Për shumë lojtarë të Milanit parashikohen vuajtje, sidomos nëse kanë boshllëqe në personalitet. Duke e nisur që nga sulmi, Rafael Leao është partneri që thuhet se mund të luajë krah suedezit. Në pak prezenca, portugezi ka ofruar spuntot minimale që mund ta shndërrojnë në një nga ata lojtarë që do të fitojë formacionin pas zbarkimit të Zlatanit. Megjithëse vetëm 20 vjeç, Leao ka sprinte, intuitë dhe driblime, praktikisht gjithçka duhet për të luajtur krah suedezit, i cili nga ana e tij do të korrigjojë qasjen e “lehtë” të Leaos gjatë ndeshjeve. 4-4-2 dhe 4-3-1-2 duken skemat e duhura për një dyshe LeaoIbrahimoviç, por në raste të veçanta portugezi mund të përshtatet si sulmues krahu në 4-33, duke rrezikuar vendin e Susos që i ka djegur të gjitha shanset e dhëna këtë sezon. Në pozitë më të rëndë Kristof Piontek, i cili raportohet në Dubai me pushime. Polaku rrezikon vendin në çdo aspekt, aq sa hamendësohet edhe largimi i tij nga Milani pas vetëm një viti.
– Duke u kthyer shtatë vite në kohë, në Milanin e I-rë të Ibrës, spikatën Kevin Princ Boateng dhe Antonio Noçerino.
Dy mesfushorë me vesin e “kredhjes” në sulm që falë hapësirave të Ibrës, ditën të shënonin në breshëri. Asokohe përfitonte Ambrozini, por edhe Gatuzo, siç e dëshmon golin me Juventusin. Sot Milani ka Çalhanoglun, Bonaventurën, që dinë si ta sulmojnë zonën rivale, por profili i duhur për të imituar kolegët e së shkuarës duket Rade Kruniç. Boshnjaku, falë dinamizmit, mund të përfitojë formacionin në dëm të Kesit, teksa në radhë të dytë qëndron Paketa, i cili nëse qëndron, mund të përfitojë nga drita e Ibrahimoviçit, që di të shkëlqejë, por edhe të bëjë të tjerët të shkëlqejnë.