Presidenti i Luftëtarit: Nesër do të federojmë afrimet

Dritë jeshile për Luftëtarin dy ditë para mbylljes zyrtare të merkatos. Dje ka qenë vetë presidenti i klubit gjirokastrit, Bekim Halilaj, i cili për “Panorama Sport” ka konfirmuar arritjen e marrëveshjes me përfaqësuesin ligjor të lojtarit brazilian, Marko Aurelio, në mënyrë që të zhbllokohet edhe sistemi për transferimet në klubin bluzi. Halilaj sqaroi se do të bëhet maksimumi që të premten të federohen disa lojtarë të rëndësishëm, që do të forcojnë skuadrën në pjesën e dytë të sezonit. “Mund të konfirmoj tashmë se kemi arritur marrëveshjen për pagesën e lojtarit Aurelio. Sot kemi mbyllur të gjitha shkresat e domosdoshme, të cilat janë dërguar në FIFA. Kemi qenë në kontakt të vazhdueshëm me zyrën juridike që përfaqëson futbollistin në Qipro. Në bazë të rregullores dhe pas bisedave që kemi pasur në orët e fundit, na është thënë se sistemi do të zhbllokohet për 24 orë. Në këto kushte, të premten, si ditë e fundit e merkatos, do të federojmë lojtarët e afruar dhe disa të tjerë me të cilët po negociojmë. Mendoj se gjithçka do të mbyllet me sukses”, sqaroi kreu i klubit gjirokastrit. Kujtojmë që tri javë më parë, FIFA sinjalizoi për bllokimin e merkatos së Luftëtarit për shkak të mospagesës së ishmesfushorit Aurelio, i cili luajti me bluzinjtë në pjesën e dytë të sezonit 2017-2018. Mësohet se klubi i detyrohet lojtarit një shifër prej 74 mijë eurosh, por braziliani ka thënë se është i gatshëm për të falur një pjesë të parave. Me sa duket, palët kanë gjetur një marrëveshje, por tashmë mbetet për t’u parë nëse FIFA do të zhbllokojë merkaton bluzi më 31 janar, pikërisht në ditën e fundit të transferimeve sa u përket klubeve të Superiores.