Apolonia shpërthen në fund, kualifikimi në ‘xhep’
Zaimaj, i ardhur në Fier nga Luftëtari, ndëshkon gjirokastritët
Apolonia mund 30 Luftëtarin në ndeshjen e parë për 1/8-at e Kupës së Shqipërisë dhe kualifikimi është shumë pranë. Loja nis pa emocione, ku dy skuadrat përpiqen të fitojnë luftën për topin e parë. Fierakët futen gradualisht në lojë dhe janë më këmbëngulës. Një kros nga thellësia gjen të lirë Gjatën në zonë, i cili gjuan fort, por jashtë. Pas 1 minute ndërrohen skenat, Oshafi vonon në gjuajtje dhe Çako ndërhyn në kohë. Gjata kroson në shtyllën e dytë, por Zoga nuk ka shënjestrën e duhur. Gjata rrëzohet brenda zonës dhe kërkon penallti, por Koçi vazhdon lojën. Në minutën e 24-t Levendi çan mes 2-3 mbrojtësve dhe futet në zonë, por e tepron me mbajtjen e topit. Luftëtari përpiqet ta balancojë lojën dhe Lika dhe Ahmetaj luajnë mirë, por Oshafi izolohet nga prapavija fierake. Sota gjuan fort pas një rrëmuje në zonë, por mbi tra. Gjirokastritët kanë dy mundësi nga dy goditje këndi, ku gjuan Puci me kokë dhe grushton Çako dhe në tentativën e dytë Açka po me kokë ndalet nga portieri fierak.
PJESA E DYTË - Mërgjyshi i “shkund” të tijtë, Apolonia shfaqet agresive dhe e mbyll Luftëtarin në mbrojtje. Më pas Duda gjuan brenda zonës dhe e detyron portierin Basha të largojë me vështirësi me këmbë. Mihana kroson nga e djathta dhe devijon Krasniqi me kokë, por jashtë. Në të 64ën Mihana pengohet në zonë dhe ka penallti, gjirokastritët protestojnë gati 2 minuta, por Koçi është i vendosur. Nga pika
e bardhë gjuan Gjata, por grushton Basha. Mërgjyshi hedh në fushë Zaimajn dhe Mehmetin në vend të Krasniqit dhe Mihanës, dy zëvendësime që rezultojnë të goditura. Ymeraj kroson saktë nga e djathta, por Gjata del huq. Në të 82-tën sërish Ymeraj nga e djathta, pasi bën rrëmujë mbrojtjen gjirokastrite, kthen topin te Mehmeti dhe gjuajtja e tij nga rreth 20
metra prehet në rrjetë. Pas 4 minutash Ymeraj nxjerr të lirë Zaimajn në zonë dhe ish-lojtari i Luftëtarit shënon golin e dytë. Zoga stopon bukur me gjoks një kros të Kumanit, por godet rrjetën e jashtme, ndërsa në të 93-tën kthen në gol një pasim të Zaimajt. Përfundimisht, 3-0, rezultat i favorshëm që fierakët të synojnë kalimin në turin tjetër.