Setien: Aventura te Barça më duket më e lehtë sesa mendoja

Trajneri: Një sulmues do të ishte i mirëpritur

Humbja e fundit dhe ndeshjet jo të mira nuk e shqetësojnë Kike Setienin, i cili thotë se është i qetë dhe po punon për t’u përmirësuar nga ndeshja në ndeshje. Ai kërkon patjetër një sulmues dhe do të ishte i lumtur që drejtuesit t’ia plotësonin këtë dëshirë në merkaton e janarit.

LEGANES - “Duam ta kontrollojmë këtë ndeshje dhe ky është objektivi ynë kryesor. Të bëjmë kujdes me kundërsulmet, ashtu si në çdo ndeshje tjetër. Nuk do të jetë e lehtë sepse rivali nuk ka asgjë për të humbur. Ata janë të qetë, ndërsa për ne është shumë e rëndësishme. Duam të kualifikohemi dhe të vazhdojmë në Kupë”.

EMOCIONET - “Mund të deklaroj që gjendja ime emocionale është e njëjta. Humbja që pësuam ishte e dhimbshme, por kjo nuk i prish planet tona. Ne po punojmë përditë për të korrigjuar gjërat që kemi gabuar. Këtë do ta bëjmë gjithmonë. Duhet të përmirësohemi”.

SULMUESI - “Unë jam shumë i kënaqur me këta lojtarë që kam në dispozicion. Nuk do ta mohoj që do të ishte interesante të merrnim një lojtar tjetër. Do të mbështetem tek ata që kam dhe kushdo që të vijë do të jetë i mirëpritur”.

KARLES PEREZ - “Largimi i tij është një vendim që e kanë marrë të tjerët dhe kanë qenë të qartë me mua. Realiteti është se nuk dua të flas për bisedat private. Nuk mund të them asgjë më tepër”.

E ARDHMJA - “Në futboll ndodhin gjithmonë gjëra të çuditshme dhe të papritura. Sigurisht që ndeshjet e ardhshme vendosin shumë. Ndodh ndonjëherë që pritshmëritë

të zhgënjejnë. Ne të gjithë e kemi të qartë rrugën dhe argumentet. Ka gjëra që nuk na pëlqen t’i shohim, por ja që i shohim. Kemi pak stërvitje në dispozicion, por do të punojmë”.

KOMUNIKIMI - “Mendoj se ajo që them kuptohet mjaft mirë. Kemi pasur 6 stërvitje, por mund të përmirësohemi shumë. Do të përpiqemi të komunikojmë mjaft mirë. Ndonjëherë është e vështirë të kuptohesh, por është normale”.

VËSHTIRËSI - “Më rezulton që gjithçka është më e lehtë sesa mendoja, sepse shumë gjëra për të cilat ne flasim i bëjmë në fushë. Dje bëmë një stërvitje spektakolare

dhe po shoh shumë përmirësime. Jam i kënaqur me cilësitë që kanë këta futbollistë. Procesi po vazhdon mirë”.

OBJEKTIVAT - “Unë jam mësuar të punoj me ata që kam në dispozicion. Nëse vjen një numër 9, do të jetë i mirëpritur. Ky ekip është i përgatitur për të luftuar për gjithçka me këta futbollistë”.

ARTUR MELO - “Ai luajti nga fillimi dhe bëri 55 minuta të mira. I mungon pak ritmi për shkak të problemit që pati. Është një lojtar fantastik”.

MESFUSHA - “Në këtë repart kam lojtarë të shkëlqyer. Është e vërtetë që disa prej tyre nuk mund të luajnë gjithmonë dhe nuk

do të kenë vazhdimësinë që duan, por sa më shumë luftë të ketë brenda skuadrës, aq më mirë është”.

LARGIME - “Nuk mund të garantoj asgjë. Janë vendime që i merr klubi për të mirën e të gjithëve. Nuk e di nëse ndonjëri do të largohet”.

FAKTORI FUSHË - “Nuk jam kurrë i qetë për një ndeshje, pavarësisht se ajo luhet në fushën time. Duhet të fitojmë, të dominojmë dhe të tregojmë të gjithë forcën tonë nga fillimi deri në fundin e ndeshjes. Nuk na falen gabimet dhe do të kërkojmë kualifikimin për në raundin e ardhshëm të Kupës së Mbretit”.