Shëtitje në Kupë, Reali në çerekfinale me poker
Zhbllokohet Benzema, skuadra e Zidanit dominon gjithçka
Reali i Madridit po vjen me një shpejtësi të rrufeshme dhe është e vështirë që të ndalet. I menaxhon ndeshjet me autoritetin që të tregojë se është i fortë, shumë i fortë. Për gjashtë minuta e zhbllokoi ndeshjen kundër Zaragozës dhe për gjysmë ore e zgjidhi këtë eliminatore duke siguruar kualifikimin në çerekfinalen e Kupës së Mbretit. Është i fortë për golat, për kontrollin e lojës dhe për fazën mbrojtëse. Gjithçka krijohet nga këmbët e Toni Krosit, i cili është vendimtar për këtë skuadër. Dha dy asiste që shërbyen për të treguar urinë që ka ky ekip dhe efikasitetin përpara portës kundërshtare. Nuk vuajti fare Reali në këtë ndeshje, më shumë për meritë sesa për gabimet e kundërshtarëve. Zaragoza është një ekip i madh që luan në kategorinë inferiore dhe për një ndeshje e tregoi këtë. Tifozët e kishin shndërruar stadiumin në një “ferr”, por trajneri i tyre i tradhtoi duke aktivizuar vetëm 4 titullarë dhe bëri shumë rrotacion. Është më e fokusuar te kampionati sesa në Kupë. Madrilenët patën shumë raste, por Vinicius dhe Joviç i gabuan. Varan u tregua i saktë për të bërë rolin e sulmuesit dhe e dërgoi topin në rrjetë. Ndeshja u bë e lehtë për Realin, i cili shënoi edhe golin e dytë pasi Kros i rrëmbeu një top Linaresit dhe e pasoi për Vaskezin që nuk gaboi.
ZHBLLOKOHET BENZEMA - Me ndeshjen të fituar thuajse që në pjesën e parë, Zidan e
shfrytëzoi të dytën për të bërë ndryshime dhe për t’u dhënë disa minuta pushim disa lojtarëve. Në festën e madhe pas kësaj fitoreje morën pjesë edhe dy sulmuesit Vinicius Xhunior dhe Karim Benzema. Braziliani shënoi një supergol pas një kombinimi të bukur me Hames
Rodrigezin. Më të lehtë e pati Benzema, i cili thjesht devijoi një asist të Karvahalit. Ky ishte një gol i rëndësishëm për francezin që rikthehet të shënojë pas shumë ndeshjesh dhe të zhbllokohet në një fazë vendimtare të sezonit. Kjo ishte një fitore e lehtë për skuadrën
e Zidanit, e cila shëtiti në transfertën që deri tani kishte rezultuar mallkim. Tifozët e Zaragozës treguan krenarinë e tyre në fund duke kënduar: “Do të rikthehemi!” Por deri kur Zaragoza do të rikthehet për t’u hakmarrë me Realin, këta të fundit pretendojnë të fitojnë gjithçka.