Mbahet asambleja e çiklizmit, ministria dhe KOKSH e injorojnë
FSHÇ bën bilancin dhe shpalos objektivat për 2020-ën
Në ambientet e FSHÇ-së pranë Parkut Olimpik në kryeqytet, është mbajtur dje analiza vjetore (2019) e Federatës Shqiptare të Çiklizmit. Merrnin pjesë drejtues të klubeve anëtare të kësaj federate, gjyqtarë dhe veteranë të çiklizmit. Ndërsa për t’u habitur është mospjesëmarrja e dy organizmave më të mëdha të sportit, KOKSH si dhe Ministria e Arsimit dhe Sporteve. Edhe pse ishin të ftuar, madje ishin planifikuar edhe në rendin e ditës me nga një fjalë përshëndetëse, ata nuk janë paraqitur. Gjithsesi, analiza vjetore vijoi punimet. Presidenti i Federatës
Shqiptare të Çiklizmit, Skënder Anxhaku, e nisi këtë analizë vjetore të dyrrotakëve me një minutë heshtje, për humbjen e bashkëshortes së një prej veteranëve të çiklizmit, Kiço Kalemi dhe më pas vijoi me rendin e ditës. Në raportin mbi analizën vjetore të çiklizmit të mbajtur
nga sekretari i përgjithshëm i kësaj federate Alfred Tahiraj, u vlerësua puna e shkëlqyer e kësaj federate për aktivitetet e shumta të mirëorganizuara dhe arritjet më të suksesshme gjatë vitit që lamë pas. Ndër aktivitetet më kryesore mund të përmendim, 6 mars 2019 me trofeun
“Tirana”, “Trofeu 26 marsi”, trofeu “Agim Tafili”. Gara më dinjitoze e çiklizmit si gjithnjë mbetet Turi i Shqipërisë, që është dhe gara e tretë më e vjetër çiklistike në Europë. Edicionin e 76-të e fitoi italiani Filipo Fioreli i klubit Gragnano Sporting Club. Aktivitetet e tjera ishin Festivali
Olimpik Rinor, turi i Shqipërisë për junior, etj. Ndër aktivitetet ndërkombëtare më të spikatura, ishin: Kampionati Europian i Rrugës, Kampionati Ballkanik i Rrugës, etj. Më pas në raport ishin planifikuar dhe objektivat e vitit 2020, ku kryesor mbetet kualifikimi dhe ftesa për një çiklist në “Tokio 2020”, bashkërendimi i punës me klubet, promovimi i talenteve, rritja e imazhit të këtij sporti. Ndërsa kreu i çiklizmit shqiptar Skënder Anxhaku do të shprehej: “Çiklizmi është një ndër sportet më të vjetra në Shqipëri, ndërsa ky është dhe një vit jubilar që përkon me 95vjetorin e themelimit të federatës sonë. Kjo na sjell më shumë përgjegjësi për të përmirësuar punën tonë. Kështu që do të forcojmë dhe rregullat pjesëmarrëse për klubet në garat e ndryshme kombëtare. Nuk do të lejohet asnjë klub pjesëmarrës, pa pasur minimalisht 4 sportistë. Jemi në dijeni të vështirësive, për çdo trajner, por duhet të japim shembullin konkret për një pjesëmarrje sa më të mirë e më cilësore. Nga objektivat kryesorë të këtij viti, është kualifikimi për në Lojërat Olimpike ‘Tokio 2020’ me të paktën një sportist dhe jemi në pritje të një ftese”.