Viron Bezhani, letër presidentëve të federatave
"Ç'do të bënit nëse sekretarët tuaj do të vepronin si Stavri Bello?!"
Komiteti Olimpik Kombëtar Sh qiptar më 9 shkurt do të mbajë asamblenë e jashtëzakonshme, mes një situate kaotike që prej muajsh mbizotëron në këtë institucion. Skandalet dhe akuzat për shpërdorim detyre dhe vjedhje na shoqërojnë thuajse çdo ditë në KOKSH, me presidentin Bezhani që ka ngritur padi ndaj sekretarit Stavri Bello e tashmë çështja ka përfunduar deri në prokurori. Siç dihet, prej disa muajsh Komiteti Ekzekutiv ka marrë një vendim duke e pezulluar presidentin Bezhani, ndërsa lëvizja e radhës e këtij të fundit është ndërgjegjësimi i federatave sportive lidhur me atë se çfarë po ndodh në KOKSH e këtë gjë ish-kampioni i mundjes e bën nëpërmjet një letre të hapur në drejtim të presidentëve të federatave sportive:
"LETËR E HAPUR PRESIDENTËVE TË FEDERATAVE SHQIPTARE TË SPORTIT
Të nderuar kolegë! Të nderuar presidentë të federatave shqiptare të sportit! Të dashur miq! Nëpërmjet kësaj letre, po ju drejtohem të gjithë juve që drejtoni një organizatë sportive kombëtare, në detyrën e nderuar të presidentit të saj. Qëllimi kryesor i kësaj letre është që t'ju informoj dhe t'ju sqaroj sa më shumë mbi atë çfarë po ndodh realisht në KOKSH. Këtë informim zgjodha ta bëj në mënyrë publike dhe transparente, pasi jam i bindur se kjo është mënyra më e mirë për të qenë objektiv dhe serioz në atë që dua t'ju komunikoj. Si anëtarë të Asamblesë së Përgjithshme të KOKSH-it, ju tashmë jeni në dijeni për atë që ka ndodhur dhe po ndodh në këtë organizatë. Në vazhdim të komunikimeve të vazhdueshme, në mënyrë të drejtpërdrejtë apo edhe nëpërmjet deklaratave të mia në media apo në emisione të ndryshme televizive, apo edhe nëpërmjet artikujve dhe shkrimeve të ndryshme që kam bërë, po mundohem t'ju jap edhe disa sqarime të tjera. Dhe për këtë do të kërkoja vëmendjen tuaj dhe, me shumë ndjesë, do t'ju kërkoja që për pak çaste, të vendoseni në pozicionin tim si president, gjë që për ju, besoj se nuk është e vështirë për t'u bërë. Pasi zbulova fatkeqësisht një sërë veprimesh abuzive dhe shkeljesh të Statutit të KOKSH-it, i kërkova Komitetit Ekzekutiv që të analizonte me përgjegjësi veprimet e sekretarit të përgjithshëm dhe të shprehnin zyrtarisht qëndrimin e tyre në lidhje me këto shkelje të tij. Por, në vend që të ndodhte një gjë e tillë dhe secili prej tyre të përmbushte detyrimin ligjor dhe të kryente detyrat dhe funksionin për të cilin në fakt është zgjedhur, një pjesë e Komitetit u "rreshtua" në mbrojtje të veprimeve të sekretarit, duke justifikuar në mënyrë të papërgjegjshme shkeljet dhe abuzimet e tij dhe duke arritur deri në absurdin: pezullimin e presidentit të KOKSH-it, i cili, në fakt, ka kërkuar vetëm respektimin e statutit, në vend që të kërkonin shkarkimin e menjëhershëm të sekretarit, që rezulton me shkelje ligjore e deri në shpërdorim të hapur të detyrës. Në fakt, është fare e qartë edhe për këta anëtarë të komitetit, dhe sidomos për ata me formim jurist që akti i pezullimit të presidentit të KOKSH-it është një akt i paligjshëm dhe aspak i moralshëm. Dhe unë, të nderuar kolegë, dua t'ju drejtohem juve me disa pyetje: Si do të ndjeheshit dhe si do të vepronit ju nëse sekretari i federatës që ju drejtoni, do të vepronte jo si ka vepruar zoti Bello, por do të kryente sa gjysma e veprimeve të tij? Si do të vepronit ju, nëse sekretari i federatës që ju drejtoni, do të merrte kompetencat tuaja dhe të Komitetit Ekzekutiv? Si do të vepronit ju nëse sekretari i federatës që ju drejtoni, do të caktonte delegacionet për aktivitetet ndërkombëtare pa vendim komiteti, do të përdorte fondet pa dijeninë tuaj, do të shkelte të gjitha rregulloret financiare të organizatës apo do të refuzonte t'ju jepte informacion? Si e gjykoni ju moslejimin e presidentit që të hyjë në ambientet e KOKSH dhe mosdhënien e dokumenteve që ai kërkon? Si do të reagonit ju nëse sekretari dhe disa anëtarë të komitetit do të organizonin një asamble të jashtëzakonshme, pa rend dite dhe pa procedura statutore, me synime të caktuara dhe tashmë të qarta nga të gjithë? Çfarë do të bënit ju nëse do të 'zbulonit' që sekretari ka hartuar, firmosur dhe zbatuar një kontratë sponsorizimi, pa dijeninë dhe miratimin tuaj dhe të Komitetit Ekzekutiv, siç ka ndodhur, në skandalin e fundit të zbuluar dhe bërë publik nga ana ime? Unë mund të vazhdoja dhe t'ju bëja pyetja të tilla pa fund, aq shumë shkelje ligjore dhe parregullsi ka sot në KOKSH. Për të gjitha pyetjet do të kërkoja një qëndrim nga ana juaj dhe, pse jo, edhe përgjigje në asamble. Unë do të jem aty duke ju pritur. Duke ju falënderuar, mbetem shpresëplotë që secili nga ju do të bëjë më të mirën për të rregulluar këtë situatë dhe për të kthyer në normalitet dhe në ligjshmëri KOKSH-in", shkruan Bezhani në letrën e tij.