Dita, zbardhen prapaskenat
Bardheblutë ia shënuan emrin në listën e federimeve, korçarët donin 50000 €
Tirana regjistron Bruno Ditën në FSHF, por vetëm si emër. Operacioni që mund ta çonte lojtarin te bardheblutë, duket se ka dështuar ose të paktën kështu thonë burimet pranë FSHF-së dhe klubit 24 herë kampion. Në institucionin e futbollit është mësuar dje se bardheblutë kanë regjistruar emrin e lojtarit, por pa sjellë ndonjë dokument, ndërsa në mbrëmje duket se gjithçka është shuar dhe Bruno Dita ka mbetur i Skënderbeut, sepse lojtari nuk do të kalojë te kryeqytetasit konfirmuan nga burime pranë klubit Tirana.
PRAPASKENAT - Në fakt, Tirana ka pritur që Bruno Dita t'i zgjidhte çështjet e tij me Skënderbeun dhe të firmoste me Tiranën. Mësohet se nuk ka pasur diskutime të drejtpërdrejta, por te Tirana kanë pritur që Dita të bëhej i gjallë dhe të kishte një marrëveshje, sepse kështu ai kishte premtuar. Gjithsesi, edhe pse nuk mund të thuhet jo përfundimisht, duket se pista "Dita" është mbyllur te Tirana. Kryeqytetasit e mbyllin merkaton pa lojtarin që shpresonin të afronin edhe pse e kanë dëshiruar deri sekondën e fundit të 31 janarit. Nëse lojtari dilte futbollist i lirë do të vishej bardheblu. Burime zyrtare pranë klubit bardheblu bënë me dije për "Panorama Sport" një javë më parë se lojtari pëlqehej shumë nga
stafi dhe vetë ai kishte shprehur dëshirën për t'u afruar te kryeqytetasit. Sipas asaj që ka mësuar "Panorama Sport", futbollisti shihej si një investim i madh për Tiranën, i cili mund të mbyllte disa boshllëqe në skuadër, duke ditur që Dita luan në disa
pozicione. Presidenti Refik Halili mësohet se i bëri një ofertë Ardian Takajt për lojtarin që ta merrte te Tirana, por gjërat nuk u lidhën. Kujtojmë se Bruno Dita ka paditur zyrtarisht klubin e Skënderbeut në Dhomën Kombëtare të Zgjidhjes së Konflikteve. Më
28 janar u zhvillua gjyqi në ambientet e FSHF-së ku Skënderbeut iu la afat që të paguante lojtarin. Dita ka mbajtur në muajt e fundit edhe shiritin e kapitenit të Skënderbeut, ndërsa, me sa duket, ka gjetur një zgjidhje nga klubi për të ardhmen.