Flamurtari, Flamurtari, katastrofë katastrofë
Oriku kërkoi dy lojtarë, nuk i la Troisi. Klubi bllokon Ribajn e Hoxhën
Flamurtari dështon në merkato. Deri në orët e vona të mbrëmjes së djeshme, kur skadoi edhe afati për federimin e lojtarëve, Flamurtari nuk ka arritur dot që të realizojë asnjë lëvizje. Edhe pse drejtuesit e klubit kanë deklaruar se e kanë paguar detyrimin ndaj rumunit Kristian Sirgi, që shkonte në 40 mijë euro, FIFA nuk e zhbllokoi sistemin për regjistrimin e afrimeve të reja. Sirgi, i cili luajti për Flamurtarin në pjesën e parë të sezonit 2018-2019, ka fituar prej kohësh gjyqin dhe pas mosrespektimit të afateve nga klubi vlonjat, FIFA ka marrë vendim më 4 shtator 2019, pikërisht vetëm pak ditë pasi të mbyllej sesioni i merkatos së verës. Flamurtari gjendet kështu në një situatë nga më të vështirat në historinë e tij, madje për herë të parë përballet me bllokim të merkatos. Në këto kushte, Bruno Lipi, Uelder Kosta, Indio Oliveira dhe Lukas Ramos do të largohen ashtu sikundër bëri edhe ish-lojtari i Milanit, Taje Taivo, apo Flosard Malçi që u zyrtarizua te Bylisi. Kështu, këta lojtarë erdhën në Vlorë, panë dhe ikën. Por, me shumë mundësi, bashkë me ta i ka orët e numëruara në Vlorë edhe trajneri Marcelo Troisi. Kushti i trajnerit brazilian ishte se qëndron te Flamurtari vetëm nëse hapet merkatoja dhe federohen lojtarët që ai ka sjellë. Në kushtet e dështimit të merkatos, Troisi nuk ka çfarë pret dhe nuk ka pse të qëndrojë më në Vlorë. Ndeshja me Kukësin e gjen Flamurtarin “të çoroditur” dhe me shumë mundësi në stol do të jetë një trajner i ri. Dritan Resuli me shumë gjasa do të jetë pasuesi
i Troisit në stolin kuqezi. PRAPASKENA ORIKUMI
“Panorama Sport” zbulon ekskluzivisht se në limitet e merkatos, ditën e djeshme, klubi i Kategorisë së Parë, Oriku, ka qenë në tratativa të vazhdueshme me Flamurtarin për të marrë dy nga katër lojtarët që gjenden në Vlorë
dhe që erdhën në merkaton dimërore. Bëhet fjalë për Bruno Lipin dhe brazilianin Luka Ramos. Drejtuesit e Orikut kanë shprehur dëshirën e tyre për të afruar Lipin dhe Ramosin. Por ka qenë trajneri Marcelo Troisi që ndaloi transferimin e tyre, duke u thënë drejtuesve të Orikumit se ka shpresë se merkatoja
mund të hapej në limite, ndaj do të prisnin deri në fund. Por, gazeta zbulon se drejtuesit e Orikut u kanë thënë atyre të Flamurtarit se këta dy lojtarë i donin vetëm për këtë pjesë të mbetur të kampionatit dhe ata ishin të lirë të ktheheshin në Vlorë në fund të sezonit.
BLLOKIMET - Flamurtari nuk e lejon largimin e Andi
Ribajt dhe Ardit Hoxhës. Dy lojtarët kishin oferta nga Greqia, përkatësisht Ribaj nga skuadra e Platanias, ndërsa Hoxha nga PAS Janina. Por, për shkak të organikës të vakët që ka ekipi në përbërje, duke qenë se as lojtarët e ofruar në merkaton e janarit nuk po federoheshin, drejtuesit e Flamurtarit kanë bllokuar kalimin në Greqi të këtyre dy lojtarëve, pasi ata janë edhe një ndër shtyllat kryesore të ekipit në këtë situatë që klubi po kalon. Burime pranë dy sulmuesve thanë dje për gazetën se Ribaj dhe Hoxhaj do të vijojnë të jenë pjesë e Flamurtarit.