Kalluci: Partizani mundet me kundërsulm, Luftëtari jo autoshkollë për arbitrat
Çelja e merkatos ndez shpresat e mbijetesës në Gjirokastër
“Luftëtari nuk ka çfarë të humbë të dielën në ndeshjen me Partizanin. Nëse skuadra do të shfaqet në fushë si me Kukësin, gjithçka është e mundur. Mosha e re e lojtarëve të ekipit tonë është e duhura për të përballur fizikisht kundërshtarin. Arma më e fortë e Luftëtarit, kundërsulmi, duhet hedhur në fushë, pasi vetëm kështu zihet ‘gafil’ mbrojtja e Partizanit”, u shpreh fillimisht “Mjeshtri i sportit”, specialisti i futbollit gjirokastrit, Theodhori Kalluci. Për ish-lojtarin dhe trajnerin e Luftëtarit humbja e thellë 1-5 ndaj Tiranës nuk duhet të kishte ato përmasa. Sipas Kallucit, Luftëtari nuk u rreshtua në fushë si me Kukësin. Lidhur me atë çka Luftëtari tregoi në ndeshjen me Tiranën, Kalluci tha: “Trajneri Çoçlli taktikisht veproi mirë, por unë kam bindjen se mungesa e eksperiencës, kryesisht në prapavijë,
dhe mungesa e golashënuesit të mirëfilltë ishin faktorët e humbjes së thellë. 2-3 lojtarë të mbrojtjes, nuk dua të ndalem në emra, pasi do të bëja gabim se janë lojtarë të rinj dhe duhen mbështetur moralisht, ishin larg pritshmërive. Ndoshta ishin të lodhur fizikisht nga ngjeshja e kalendarit. Mushkëria e skuadrës, që është mesfusha, nuk e bëri punën e saj mirë. Munguan kombinimet dhe ndërthurja e reparteve. Në momentin e golit të realizuar nga Çela u evidentua zgjuarsia e mesfushës. Oshafi do pak kohë të mbajë barrën e sulmit. I thashë të gjitha këto për të mos bërë të tilla gabime me Partizanin. Të dielën lojtarët të hyjnë me besim në fushë. Partizani nuk është skuadra e sezonit të shkuar, ndaj lojtarëve tanë u duhet më shumë dhe besim në vetvete për të përsëritur ndeshjen me Kukësin”.
GJYKIMI - Të vetmes gjë që Kalluci i druhet nesër ndaj kampionëve në fuqi është arbitrimi. “Luftëtari nuk është autoshkollë ku të mësojnë arbitrat e rinj. Në letër, kam përshtypjen se një pjesë e mirë e opinionit e sheh si ndeshje të lehtë. Jo, kam mendimin se nuk do të jetë e tillë. Luftëtari nuk ka pse të frikësohet, por të besojë te rezultati pozitiv deri në vërshëllimin përfundimtare të lojës. Një gjyqtar kompetent dhe profesionist do t’i bënte mirë lojës së Luftëtarit”, vijoi Kalluci.
MERKATO - Sa i takon merkatos, Kalluci është skeptik, por hapja në limite është një shenjë shprese për mbijetesën. Përveç kontributit për Luftëtarin, ish-sulmuesi ka qenë edhe pjesë e Partizanit në vitet 1971-1972. “Merkatoja e hapur në limite nuk favorizon, pasi koha nuk premton. Lojtarët e afruar nuk kanë eksperiencën e mjaftueshme për të ndihmuar skuadrën. Hapja e merkatos mund të konsiderohet si burim shprese për mbijetesën. Shpresa vdes e fundit dhe këtë duhet të shfrytëzojë Luftëtari për mbijetesën, por edhe Partizani për të dalë sërish kampion. Uroj që të dy skuadrat t’i arrijnë objektivat në fund”, përfundoi ishsulmuesi i dy ekipeve, Theodhori Kalluci.