Kukësi gjen zgjidhje për sulmin, firmos Kuper i Shafhauzenit
Kukësi bën afrimin e parë në merkaton e janarit. "Panorama Sport" zbulon ekskluzivisht se gjatë ditës së djeshme klubi ka arritur marrëveshjen me sulmuesin 22-vjeçar me nënshtetësi italiane, Godberg Kuper.
SULMUESI - Bëhet fjalë për një qendërsulmues, i cili vjen pas aktivizimit te Shafhauzen në Ligën e Dytë zvicerane. Kuper ka firmosur një kontratë 1.5vjeçare dhe konsiderohet si një alternativë ideale e Vasil Shkurtajt. Sapo klubit, kur ia kanë ofruar sulmuesin ganez me nënshtetësi italiane, drejtuesit nuk janë menduar dy herë. Sapo kanë parë skedën dhe aspektin sportiv të lojtarit dhe mbas njohjes me kushtet kontraktuale, e kanë pranuar menjëherë si afrim. Aq më tepër që lojtari vjen i lirë dhe jo në huazim. Drejtuesve të Kukësit, përveçse mund t'u bëjë punë ky lojtar në skuadër për arritjen e objektivave, kanë parë edhe mundësinë e bërjes biznes me kartonin e tij. Pra, ta promovojnë lojtarin e më pas pse jo, të tentojnë edhe shitjen e tij me vlera të kënaqshme për financat e klubit. Karakteristikat fizike kanë bërë që oferta të pranohej direkt dhe mendimi i drejtuesve ishte pa dyshim për po, duke parë dhe qartësisht hendekun për sulmues. Me largimin e Dakut, trajnerit Duro i duhej një sulmues, pasi nëse do të mungonte Shkurtaj, nuk do të kishte asnjë alternativë tjetër të mirëfilltë për qendrën e sulmit. Në gjysmën e parë të këtij sezoni,
Kuper ka luajtur vetëm gjashtë ndeshje në Ligën e Dytë helvete pa lënë shumë gjurmë, pa gol dhe pa asiste.
KARRIERA - Godberg Kuper ka lindur në Itali më 20 gusht 1997 nga prindër emigrantë ganezë. Ai ka marrë nënshtetësinë italiane, por mban edhe atë ganeze. Dhe pse shumë i ri, sulmuesi është i shumëshëtitur në karrierën e tij. Ai ka qenë pjesë e disa
klubeve në Portugali si Arouka, Espinjo, Vianense e më pas te Shafhauzen. Ai luan si sulmues qendre si dhe në krahun e djathtë dhe është 190 centimetra i gjatë. Tanimë, krahas titullarëve dhe lojtarëve që do të vazhdojnë të mbajnë peshën në skuadrën verilindore, në organikë është shtuar edhe një alternativë, për të cilin pritshmëritë janë të mëdha.