Strakosha-Berisha, superdueli kuqezi para syve të Edi Rejas
Shqipëria e ka të ardhmen të sigurt në lidhje me rolin e portierit titullar. E tashmja dhe e ardhmja janë të garantuara, të paktën me dyshen Etrit Berisha dhe Thomas Strakosha. Dy gardianët në karrierën e tyre në vitet e fundit kanë shumë pika takimi mes tyre dhe tanimë, roli i titullarit në Kombëtare i përplas edhe një herë, si dikur te Lacio. “Gazzetta Dello Sport” sjell në vëmendje se fundjava në Serinë A italiane do të rezervojë një ndeshje ku më shumë sesa tri pikët, do të vlejë shumë dueli në skajet e fushës: Strakosha-Berisha. Në këtë përballje direkte, në lojë janë më shumë sesa vetëm 3 pikët e ndeshjes së radhës. Të dielën në “Olimpico” me nisje nga ora 15:00, nuk do të dalin në skenë vetëm Lacio dhe SPAL, por një përballje totale mes Thomas Strakoshës dhe Etrit Berishës. Për portierin e Lacios, përballja me bashkëpatriotin e tij është një tabu e vogël: në katër përballje direkte mes tyre, skuadrat e Berishës (në fillim Atalanta e tani SPAL) kanë grumbulluar tetë pikë, kundrejt dy që ka marrë Lacio.
RIVALITETI - Në vitin 2013, Berisha kishte ardhur te Lacio për të qenë portieri titullar, por nuk ia doli asnjëherë që të parakalonte Marketin në hierarki. Për këtë, pas tri sezonesh të konsideruara zhgënjyese në përgjithësi pasi koleksionoi vetëm 38 ndeshje në Serinë A dhe pësoi 47 gola me bardhekaltrit, vendosi që të largohet duke i bërë vend Strakoshës.
STRAKOSHA - Portieri aktual i Lacios ka përfituar nga situata pas largimit të Berishës në vetëm pak muaj, duke shfrytëzuar më së miri problemet fizike të Marketit. Pasi ky i fundit shfaqi shqetësime, Thomas fitoi vendin e titullarit. Në derbin e fundit bëri një gabim dhe i dha mundësinë Xhekos që të shënonte lehtësisht, gjë për të cilën ka kërkuar publikisht falje që ua vështirësoi ndeshjen shokëve të ekipit, tani duhet që Strakosha të rikthehet i rëndësishëm për skuadrën. Mbi të gjitha, të dëshmohet superior kundrejt Berishës.
KOMBËTARJA - Në dy ndeshjet e fundit të luajtura nga Shqipëria, kundër Andorrës dhe Francës, trajneri Edi Reja preferoi portierin e SPAL. Nuk është një sinjal i mirë, duke ditur që Reja është një ish i dyfishtë në këtë përballje (i rritur në sektorin e moshave te SPAL, duke hedhur hapat e parë prej profesionisti dhe më pas ka stërvitur Lacion nga 2010-2012 dhe në 2014-ën), me shumë mundësi që nuk do ta humbasë përballjen e së dielës. E pikërisht, edhe për këtë, për vetë praninë e mundshme të Edi Rejas në Lacio-SPAL, Strakosha nuk mund t’i lejojë vetes asnjë lloj gabimi.
LACIO-SPAL - Të dielën, në “Olimpico”, Lacio dhe SPAL do të luajnë shumë: vendësit duhet të fitojnë për të vijuar ecurinë në Champions dhe për të qëndruar në ritmin e trenit ‘titull’ në Serinë A. Miqtë, nga ana tjetër, duhet të sigurojnë pikë për të dalë nga zona e rënies. Edhe sfida brenda sfidës mes Strakoshës dhe Berishës e rrit shumë tempin. Luhet për shumë më shumë sesa vetëm 3 pikë...