Manaj gol dhe të kuq, shënon edhe Roshi
Dy të verdhë në 49', 22-vjeçari del me karton të kuq
Stërvitja e dytë me Mesin dhe goli i parë me fanellën e Barcelonës. Dje, për Rei Manajn, emri në listë nuk ishte në ekipin e yjeve, por në skuadrën B të katalanasve, pikërisht për ku edhe është blerë, në mënyrë që të ketë mjaftueshëm hapësirë dhe t'i japë një dorë për ta ngjitur në La Liga Dy. Sulmuesi i Kombëtares shqiptare ka qenë sa i zoti, i pafat, por edhe pak pa eksperiencë në gjithçka ka ndodhur në pjesën e parë.
HERO
Rei Manaj ka udhëhequr sulmin e katalanasve në fillimin e ndeshjes kundër Pratit. Skuadra e Barcelonës B ka qenë dominuese dhe ka krijuar një mori rastesh për shënim. Në minutën e 27-të, është pikërisht Rei Manaj që gjen golin e parë të vlefshëm për skuadrën e Barcelonës B. Një javë më parë, në debutim, ai gjeti rrugën e rrjetës, por goli nuk iu akordua, duke qenë se u konsiderua faull. Dje, shqiptari u vu përballë portës nga pika e bardhë e 11 metrave dhe me ftohtësi, gjuan tokazi dhe në mes të portës duke mos i dhënë shanse portierit kundërshtar. Jo vetëm kaq, por Manaj iu afrua edhe me goditje me kokë golit. Pa fat. Një tjetër ishte traversa e goditur prej tij.
PA EKSPERIENCË
Rei Manaj është vetëm 22 vjeç, por ndaj tij ushtrohet presion si të ishte lider prej dekadash në fushë. Bomberi i Kombëtares shqiptare dje është ndëshkuar me dy kartonë të verdhe krejt të panevojshëm dhe mbase edhe të shmangshëm prej tij. Të parin, në të 31-tën minutë, një duel ajror i shqiptarit me dorën e hapur drejt fytyrës së mbrojtësit kundërshtar i kushton karton. Në këtë rast, edhe mbrojtësi kundërshtar e bën detyrën e tij, teksa sapo sheh dorën fare afër në fytyrë, bën pjesën e të dëmtuarit.
"DJALL"
Barcelona B po fitonte, ishte në avantazh të një goli dhe po krijonte volum rastesh. Mirëpo, në fund të fraksionit, Manaj tregon edhe një herë mungesë eksperience. Në fund të kohës shtesë në të parën, Rei Manaj sërish në duel me një mbrojtës kundërshtar, pasi i fiton pozicionin ai, Manaj e tërheq me dorë në shpatull dhe fyt. Arbitri është fare pranë dhe e ndëshkon sërish me karton, që është i dyti për sulmuesin e Kombëtares. Barcelona B luan pjesën e dytë në inferioritet numerik, por pasi barazohet në minutën e 77-të nga Raijo, gjen golin e fitores në 90-të me De La Fuente. Një gol për 3 pikë që i japin mundësinë shqiptarit të shohë Barcelonën B në vendin e dytë, me golin e tij të parë për katalanasit.