Çoçlli: Dy golat e parë i dhuroi portieri, ja pse bëra ndryshime
Ju tregoj pse e ndryshova portierin
Luftëtari humbi me rezultatin 0-3 nga Partizani në shtëpi. Trajneri i gjirokastritëve, Nikolin Çoçlli, në prononcimin e dhënë pas ndeshjes për “SuperSport”, u shpreh se skuadra nuk mund të bënte diçka më shumë, kur ndeshja nisi në disavantazhin e dy golave. Ai sqaroi edhe ndryshimet në formacion, kryesisht për aktivizimin e portierit Shala.
Humbje në kundërshtim me atë që bëtë me Kukësin, pse ndodhi kështu?
Pa dyshim ishte një ndeshje e vështirë, pasi Partizani kërkonte kthesën, të cilën e realizoi. Nuk jemi një skuadër e madhe. Nuk jemi as Reali dhe as Barcelona që të kthejmë ndeshjen nga 0-2, pasi dy gola që pësuam, i fali portieri. Çfarë mund të presim kur pësojmë 2 gola që në fillim, pasi jemi dhe një skuadër e brishtë në të gjitha nivelet. Mendova të bëja çdo gjë si çdo trajner në një moment të tillë. Lojtarët u munduan të bëjnë diçka, por trauma ishte e madhe.
Pse aktivizuat Shalën dhe jo Qyranin?
Duhet të dimë një gjë, është një shprehje: Portieri është çatia e shtëpisë. Kur kam ardhur, kam dashur të marr një portier me eksperiencë. Në merkato, gjendja ishte e hallakatur. Pas paraqitjes jo të mirë të Qyranit
në Tiranë, vendosëm të luante Shala. E prisja të gabonte, por jo kaq shumë.
Kishte shumë ndryshime në raport me ndeshjen me Kukësin?
Arsyet që u bënë këto lëvizje ishin: Me Dushkajn donim të neutralizonim Trashin; me Demon doja të siguroja prapavijën, mendova ai që do japë një shembull të mirë në skuadër. Oshafi luajti si sulmuesi i dytë, pasi luan në dy pozicione.
Merkatoja do bëhej, por jo në rangun e lojtarëve cilësorë. Një lojtar cilësor ka një vlerë të madhe. E kam thënë dhe më kanë premtuar se do të ketë lojtarë të rinj me perspektivë. Merkatoja na penalizoi që të kishim një fryt të mirë. Zaimi dhe Spahiu na dhanë shenja të mira, por mosrealizimi i merkatos na dëmtoi. Lojtarët janë të rinj dhe kundër Partizanit do të kenë emocione. Shumë shpejt pësuam dy gola. Lojtarët i porosita që mos të pësonim gola në 30 minutat e para. Kjo është situata, por kurrsesi nuk dorëzohemi.