Sormani tregon sekretin e Partizanit
“Kemi një skuadër të ekuilibruar dhe pragmatiste, jemi të përulur dhe punojmë fort”
Partizani triumfoi në transfertë ndaj Luftë tarit me rezultatin 03. Ky ishte triumfi i parë i trajnerit Adolfo Sormani në aventurën e dytë në krye të pankinës së kuqe. Në prononcimin edhe pas ndeshjes për “SuperSport”, trajneri italian në fillim foli për fitoren e arritur në Gjirokastër, ndryshimet në vendosjen e skuadrës në fushë. Trajneri sqaroi edhe dëmtimin e Solomonit, efikasitetin e sulmit, gjobitjen e skuadrës nga presidenti. Për trajnerin e të kuqve, sekreti i suksesit është funksionimi si një trup i vetëm. Sipas tij, vetëm duke qenë dhe punuar të bashkuar do të ecin përpara. Ndëshkimin e presidentit Demi pas humbjes në Kupë, Sormani e shikon si një mesazh për kompaktësinë e skuadrës në vijim.
Më në fund vjen edhe fitorja e parë nën drejtimin tuaj...
Ne kemi punuar shumë gjatë gjithë kohës. Sot (dje) u pa rezultati i punës. Duhet të punojmë të gjithë së bashku. Të jemi gjatë gjithë kohës së bashkuar. Ky është sekreti i suksesit. Të punosh të bashkuar dhe rezultatet do të vijnë. U nisëm me idenë për të krijuar diçka të mirë, por kjo do kohën e vet. Nuk kemi pasur as shumë kohë për të punuar sepse kemi luajtur shumë ndeshje. Po shikoj frytet e punës. Nga ana psikologjike nuk mund të ishim mirë për shkak të rezultateve negative. Paraqitjet kanë qenë të mira edhe ndaj Skënderbeut dhe Kukësit. Të gjithë e dimë që meritonim më shumë.
Sa ndikuan ndryshimet në vendosjen e lojtarëve?
Unë mendoj se në futbollin modern nuk duhet të ketë një pozicion fiks dhe të përsosur.
Mendoj se lëvizshmëria është gjithçka që bën diferencën. Nëse vendosim dikë në pozicion statik, bëhet i parashikueshëm. Duhet të jesh i paparashikueshëm, kjo është ajo që bën diferencën dhe nga kjo vjen suksesi.
Si është gjendja e Solomonit?
Për Solomonin do ta verifikojmë, por nuk besoj se ka gjë serioze.
Pse Çinari shpërdoron kaq shumë?
Më pëlqen shumë mënyra si po luan dhe si po e ndihmon ekipin. Më intereson pak
kush realizon. Herët a vonë goli do të vijë. Rëndësi për mua ka paraqitja dhe sakrifica për skuadrën.
A dha efekt gjoba e presidentit Demi në këtë sukses?
Mesazhi i presidentit nuk kishte të bënte me gjobën, por ishte një mesazh ndryshe.
Nuk ishte gjoba çështja kryesore. Është një mesazh që i shërbente kompaktësisë dhe punës që bën skuadra gjatë gjithë kohës.
Jeni i kënaqur me efikasitetin e sulmuesve?
Unë jam i kënaqur, sepse kemi një skuadër të ekuilibruar.
Një skuadër që sulmon mirë, një skuadër e shkurtër. Ekuilibri është baza e gjithçkaje. Edhe me Kukësin patëm mundësi pa fund dhe nuk gjetëm golin. Ne jemi pragmatistë, sepse jemi të përulur dhe punojmë fort. Ky është pragmatizmi ynë.