“Fitorja na rrit besimin, deri në fund për titullin”
Fitorja e Partizanit në Gjirokastër ka vlera të shumëfishta, për vetë situatën dhe krizën ku ishte zhytur ekipi. Përveç kthesës në rezultat, lajm i mirë përbën edhe shënimi i tre golave dhe autorët e tyre. Solomon gjen golin pas 4 muajsh, Melo pas 3 muajsh e gjysmë, ndërsa Ron Broja ka shënuar golin e parë me fanellën e Partizanit. Mesfushori kosovar, në prononcimin e dhënë pas ndeshjes për mediat ka vlerësuar më shumë kthimin e skuadrës te fitorja, sesa golin e tij të parë me “demat”, që shpreson të mos mbetet i vetëm në këtë edicion. “Jemi të lumtur për këtë fitore që arritëm ndaj Luftëtarit. Na mungonte shumë ky sukses dhe kishim uri për këtë fitore. Një fitore e cila na rrit moralin, pasi kishim rënë shumë në këtë fillimviti, sepse vinim nga disa humbje. Shpresojmë se nga ky sukses të nisë vazhdimësia për Partizanin. Fitorja na rrit besimin dhe rikthen qetësinë në skuadër. Gjatë javës jemi fokusuar maksimalisht te Luftëtari dhe ia dolëm me frymën e grupit dhe zbatimin korrekt të detyrave të dhëna nga trajneri Sormani”, u shpreh fillimisht Ron Broja.
GOLI- Sa i takon golit të parë me fanellën e 16 herë kampionëve të vendit, 23-vjeçari nga Mitrovica shkurtimisht tha: “Nuk jam nga ata lojtarë që më pëlqejnë dedikimet. Shënimi i golit është moment i veçantë. Pak i vonuar, por jam mjaft i lumtur për golin, erdhi në kohën e duhur. Shpresoj që të shënoj më shumë për Partizanin në ndeshjet e tjera”.
NGËRÇI NGA DERBI- Humbja në derbin e 13 dhjetorit bëri që Partizani të nisë krizën e rezultateve, por për Brojën ngërçi është më kompleks. “Ecuria negative nuk është vetëm çështje e humbjes në derbi. Patëm disa probleme, na penalizoi edhe fati, kanë qenë ndeshje të vështira, por mendoj se do të kthehemi”, vijoi Broja. Titulli- Mesfushori kosovar ka besim se Partizani do ta mbrojë titullin në fund. “Nga Gjirokastra le të nisë vazhdimësia e Partizanit. Ndeshje pas ndeshjeje do japim më të mirën për të arritur objektivin, mbrojtjen e titullit kampion”, përfundoi Ron Broja.