Kukësi pa frena, spektakël në Vlorë
Flamurtari s’gjen shpëtim as nga ajo perlë nga distanca e Vrapit, zhytet më keq në fund
Kukësi nuk di të ndalet, thyen edhe Flamurtarin. Pas atij gabimi në Gjirokastër, të besuarit e Shpëtim Duros kanë nisur marshimin. Në Vlorë pati spektakël dhe 5 golat janë dëshmia më e mirë. Përtej perlës së Vrapit, dopio-Shkurtaj, Musolli dhe Çema nuk e diskutuan fitoren e dytë radhazi të verilindorëve, që sjell blindimin e vendit të parë. Kuqezinjve nuk u mjafton shpirti dhe dëshira e të rinjve për të gjetur kthesën e madhe. Më keq se kaq nuk ka ku shkon për vlonjatët, pasi zyrtarisht pësuan humbjen e 14-të në 20 ndeshje të zhvilluara.
PJESA E PARË
Kukësi e nis me ide të qarta lojën. Zotëron topin dhe në të 7-ën ndërton të parin aksion të rrezikshëm, që zhbllokon edhe shifrat. Maliqi merr krahun dhe pason në qendër për Shkurtajn, vlonjati gjuan direkt me të djathtën dhe 0-1. Gjithçka bëhet më e thjeshtë për miqtë, aq sa kur hyn e 11-ta minutë fitojnë edhe një penallti. Një ndërhyrje naive e Moçkës ndaj Gavazajt, detyron Andi Koçin që të tregojë pikën e bardhë. E merr përsipër Shkurtaj dhe e djathta e tij është e pagabueshme. Me avantazh të dyfishtë, gjithçka bëhet më e thjeshtë për verilindorët. E megjithatë, Flamurtari nuk është pasiv. Ata mundohen që të kundërpërgjigjen, paçka se kundërshtarët bëjnë rezistencë të fortë. Në të 36-ën Ribaj mund të ngushtonte rezultatin, por Xhika bën heroin. Me këmbën e djathtë largon rrezikun dhe i thotë “jo” një goli të sigurt. Kuqezinjtë qëndrojnë në pozita pritjeje, edhe pse Ribaj e gjen mundësinë që në të 45-ën të bëjë një tentativë të fundit për këtë pjesë. Gjuan me kokë, por topi përfundon mbi kuadratin.
PJESA E DYTË
Asnjë ndrysim në formacionet respektive, e megjithatë Flamurtari mundohet që të bëjë diçka më shumë në këtë pjesë të dytë. Ribaj shpërdoron fillimisht, por mendon Vrapi që ta shtangë Kukësin me një perlë. Një dyluftim i Maliqit me Rrapajn, çon topin te sulmuesi tiranas, që plot klas shkarkon të majtën nga 25 metra dhe gjen rrjetën. As 4 minuta dhe miqtë mund të gjenin golin e qetësisë, por Moçka është vendimtar përballë Abazajt. Portieri i Flamurtarit bën sërish heroin në të 65-ën, kur i mohon rrjetën Limajt me një superpritje. Gjithsesi, verilindorët e ndëshkojnë në të
69-ën pas një korne. Është Gavazaj ai që e çon topin në zonë dhe Musolli i pambuluar nga mbrojtja vlonjate, kërcen dhe me kokë shënon. As në disavantazh të tre golave, kuqezinjtë nuk dorëzohen. Qarkullojnë dendur topin dhe nisin që të organizohen
në sulm. Në të 77ën Rrapaj harkon një top në zonë nga një goditje dënimi, Ribaj e ul me gjoks për Pjeshkën, por kthesa e shkodranit përfundon vetëm jashtë. Flamurtari duke tentuar që të ngushtojë shifrat, lë hapësira pas. Kaq u mjafton verilindorëve
që të përfitojnë. Në të 80-ën Aliaj i vjedh topin Abazajt, por nuk e mbron dot. Çema është i vëmendshëm dhe pasi kontrollon topin me të djathtën, me të majtën e çon në rrjetë. As 8 minuta në fushë dhe gjen golin e parë në elitë dhe vulos “pokerin”. Dy minuta para fundit është Rrapaj qe harkon një top perfekt nga e majta në zonë, por Ribaj me kokë nuk ka shënjestër. Janë edhe tre shtesë, por rezultati mbetet i pandryshuar. Kukësi blindon kreun, ndërsa Flamurtari zhytet edhe më keq në fund.