Daja: Më kënaq një pikë vetëm nëse...
“Goditja jonë në merkato është rikthimi i Jashanicës”
Skënderbeu është gati për të marrë një tjetër rezultat pozitiv në kampionat, me qëllim që të vijojë ecurinë e mirë në këtë start të vitit 2020. Në një intervistë për “Panorama Sport”, trajneri Ilir Daja kërkon maksimumin nga lojtarët, në një takim që ai e cilëson të një shkalle të lartë vështirësie. Daja komenton edhe merkaton në hyrje dhe dalje, ku pa dyshim pengu më i madh mbetet largimi i pritshëm i Dejvi Bregut. Për kreun e pankinës korçare, edhe një pikë në këtë takim nuk do të ishte keq për Skënderbeun, por ai beson se lojtarët do të bëjnë gjithçka për fitoren. Mungesa e qendërsulmuesit kryesor të ekipit, Blerim Krasniqi, ia prish edhe më tepër planet trajnerit bardhekuq.
Profesor, merkatoja e Skënderbeut u mbyll me gjashtë afrime. I kënaqur nga ajo që bëri klubi?
Çdo trajner kënaqet në momentin kur ka afrime cilësore dhe shërbejnë në rritjen e cilësisë së ekipit. Do të thosha se nëse do të ishin të gjithë lojtarët të gatshëm për t’u përdorur menjëherë, atëherë do të ishte shumë herë më mirë. Kemi kërkuar të mbulojmë ato pozicione ku kemi pasur probleme gjatë pjesës së parë të kampionatit dhe normalisht kemi ditur të bëjmë diçka. Duke parë vështirësitë që ka kjo merkato, them se kemi lëvizur mirë. Për më tepër, duhet të theksoj se goditja më e madhe në merkato nga ana jonë ka qenë Bajram Jashanica, i cili rikthehet së shpejti. Dihen vlerat e këtij lojtari dhe sa shumë na ka munguar në qendër të mbrojtjes.
Dejvi Bregu drejt largimit, do të ishte humbje e madhe për ju?
Vlerat e Dejvi Bregut janë
të ditura tashmë dhe nuk ka pse të përsëriten. Është një lojtar i cili na ndihmonte shumë në fushë dhe ishte mjaft i rëndësishëm për ne. Një lojtar që kishte ritëm jo vetëm në ndeshje, por edhe në stërvitje. Kjo e bënte atë shumë të rëndësishëm. Nëse do të
largohet, pa dyshim që do të jetë një humbje, por duke ditur strategjinë e klubit, mbetet një lëvizje e mirë.
Në kampionat ju pret një ndeshje delikate në Laç. Si e parashikoni?
Vërtet është një ndeshje e vështirë, pasi Laçi ka një ekip
me kualitete dhe duhet të jemi shumë të përqendruar. Pres nga ekipi im që të japë maksimumin në këtë takim dhe të kërkojë vazhdimësinë e rezultateve pozitive.
Keni fituar në Laç, por gjithashtu keni humbur ndaj këtij kundërshtari në Korçë.
Çfarë prisni ndryshe këtë herë?
Ndeshjet ndryshojnë në specifikat që kanë nga njëratjetra. Mund të them se do të jetë një ndeshje e fortë dhe që duhet luajtur me shumë kujdes dhe përqendrim.
Pra, do të jeni të kënaqur edhe me një pikë...?
Do të isha i kënaqur vetëm me një pikë, gjithnjë nëse do të zhvillonim një lojë të mirë dhe të rrisnim produktivitetin tonë në fushë. Gjithsesi, për të qenë i sinqertë, dua që ekipi im të tregojë forcë karakteri në këtë takim dhe të luajë futboll të bukur, sikundër kemi bërë në ndeshjet e forta që kemi pasur në këtë kampionat.
Pavarësisht dy fitoreve, Skënderbeu vijon të mbetet në zonën e nxehtë. Sa ju shqetëson fakti që jeni në një pozicion që ju çon në “play out”?
Kemi nisur vitin me dy rezultate pozitive dhe normalisht kjo është diçka mjaft e mirë. Nuk na shqetëson aspak pozicioni në renditje, pasi diçka e tillë rikuperohet nëse bëjmë mirë. Ne duhet të vazhdojmë me rezultatet pozitive dhe të jemi të përqendruar vetëm për këtë.
Mungesa e Blerim Krasniqit sa e penalizon Dajën te zgjedhja e formacionit?
Është një mungesë e rëndësishme për ne dhe shpresojmë që shpejt ta kemi gati. Një lojtar si Krasniqi gjithmonë ka qenë i rëndësishëm. Do të shohim se çfarë do të bëjmë për ta zëvendësuar më së miri.