Dinamo e rilindur, trondit Erzenin në Shijak
Shijakasit në krizë të thellë, rrezikon edhe Nica
Erzeni nuk po arrin të dalë nga kriza, mundet në shtëpi edhe nga Dinamoja e vendit të fundit, që me riorganizimin e bërë në janar duket krejtësisht tjetër skuadër. Ndeshja e zhvilluar në "Tofik Jashari" paraqiste interes, edhe pse ndesheshin dy skuadra me objektiva të kundërt, Erzeni për t'u ngjitur në 4-shen e parë, ndërsa Dinamo në vend të fundit për të mos rënë nga kategoria. Nisur nga ky fakt, mendohej se Erzeni, me potencialin që ka aktualisht, do ta kishte të lehtë të fitonte, por është befasuar nga Dinamoja, që realisht është një emër i madh, por që kohët e fundit ka kaluar shumë vështirësi. Qindra tifozë shijakas janë larguar kokulur nga stadiumi, pasi prisnin fitoren, e cila në fund i buzëqeshi Dinamos. Për blutë është fitorja e dytë që ka vlera të mëdha morale në këtë moment.
NDESHJA - Nga fillimi në fund loja ka grintë, sepse të dyja ekipet kërkojnë t'i rrëmbejnë njëra-tjetrës pikët e plota. Gjatë 10 minutave të para ka një superioritet të Erzenit, që rrezikon dy herë me Xhixhiuan dhe Rezin. Më pas janë dinamovitët që reagojnë dhe krijojnë dy raste të mira, së pari me Spahiun dhe më pas me Alcanin, i cili nga jashtë zonës lëshon një "predhë" drejt Vatës dhe ky i fundit shmang një gol të sigurt, duke e devijuar topin jashtë. Pas një kombinimi të Pontrelit dhe Spahiut, Dinamo
rrezikon sërish, por shpëtimtar bëhet Vata. Erzeni tenton me Xhixhiuan, gjithmonë problematik për mbrojtjen e Dinamos, por afrikani nuk shfrytëzon si duhet një top të Gecajt dhe brenda zonës gjuan jashtë. Në minutën e 41-të, sulmuesi Rezi
pengohet brenda zonës dinamovite dhe gjyqtari akordon penallti për Erzenin. Gjuan vetë Rezi dhe tifozët shijakas shmangen, sepse portieri Kuka pret mjeshtërisht. Ky moment u jep krahë futbollistëve të Dinamos për t'u hedhur në sulm. Por, edhe shijakasit e kalojnë momentin e vështirë dhe vihen në kërkim të golit, por hasin në mbrojtjen e organizuar të Dinamos. Kur pritej që Erzeni të kalonte në avantazh, godet Dinamo. Është minuta e 70-të dhe dy futbollistë të ardhur nga stoli bëhen protagonistë të golit. Ortolani nga e djathta jep një pasim për Kolgegën, i cili gjuan bukur me të djathtën, duke mposhtur portierin Vata. Përpjekjet e Erzenit vazhdojnë deri në përfundim të ndeshjes, duke llogaritur edhe ato 5 shtesë, por asgjë nuk ndryshon dhe Dinamo fiton 0-1.