"Mëkat ta lësh Dibalën në stol, por këtë herë më duhej Duglas"

Mauricio Sarri fitoi një ndeshje shumë të rëndësishme që konfirmoi edhe një herë tjetër provën e Ronaldos, zero gola të pësuar dhe performancën e shkëlqyer të Duglas Kostës. "Ishte një ndeshje e vështirë, por nuk vuajtëm shumë. Në nivelin e ritmit ende nuk jemi në maksimum dhe pres që të përmirësohemi. Në mbrojtje ishim shumë të zotët dhe i bëmë mirë detyrat për të mos lejuar kundërsulmet e kundërshtarëve. Duglas Kosta? Është një lojtar shumë i rëndësishëm. Kemi shumë lojtarë të shkëlqyer në aspektin sulmues dhe kam mundësi zgjedhjesh, edhe pse nuk është e lehtë t'i menaxhosh. Duke parë ndeshjen e sotme (djeshme) ndaj një ekipi si FIorentina, e cila krijon shumë densitet dhe luan me ekipin përpara portierit zgjodha Duglasin për të zgjatur repartin tonë sulmues. Ishte një zgjedhje taktike, por pastaj sigurisht që je i zhgënjyer për faktin që lë jashtë Dibalën. Është një mëkat i madh ta lësh në stol një lojtar të tillë dhe mjafton të shohësh 20 minutat që luajti", ka thënë Sarri. I pyetur nëse mund t'i aktivizojë 4 lojtarët e sulmit ai thotë që do të krijonte probleme. "Nëse do të luanin të katërt (Higuain, Dibala, Ronaldo, Duglas) do të sakrifikonin karakteristikat. Vetëm Ronaldo do të ishte në vendin e tij për të bërë realisht lojtarin e krahut. Do të ishte shpërdorim", vazhdoi trajneri i "Zonjës". Ai vlerësoi edhe Ronaldon dhe Rabionë. "Kristiano po shënon vazhdimisht dhe kjo është e rëndësishme. Do t'i bëjë mirë dhe është në formë të mirë fizike. Rabio? Është duke u rritur dhe po luan ndeshje të rëndësishme. Tifozët e duartrokitën dhe kjo është diçka pozitive për të. Duhet të vazhdojmë të punojmë të gjithë sepse nga ndeshja në ndeshje po përmirësohemi", përfundoi trajneri bardhezi.