Frakturë në gisht për Handanoviçin, zikaltrit të gjymtuar përpara Milanit

Shqetësime të reja për Interin e Antonio Kontes. Samir Handanoviç, portieri dhe kapiteni zikaltër, u nis ditën e djeshme me skuadrën në Udine, por ishte i padisponueshëm për shkak të një problemi në gisht. Dëmtim jo i vogël, që rrezikon ta nxjerrë jashtë loje jo vetëm për sfidën kundër Udinezes, por edhe për derbin.

REZERVA - Sipas raportimit të mediave italiane, sllovenit mund t'i nevojitet një pauzë prej disa javësh për t'u riaftësuar nga problemi në gisht. Në vend të Handanoviçit mes shtyllave qëndroi Daniele Padeli, tek Interi prej tri vitesh, por ende pa asnjë paraqitje në Serinë A deri në mbrëmjen e djeshme. Pasi ka llogaritur mungesën e Lautaro Martinezit, i skualifikuar për dy javë, Konte rrezikon të humbasë edhe sigurinë "Handanoviç" për supersfidën kundër Milanit. Një problem më shumë që mund t'i heqë siguritë prapavijës dhe t'i ndërlikojë më shumë planet trajnerit zikaltër për të qëndruar në hapat e Juventusit. Hera e fundit që Handanoviç kishte munguar në një ndeshje ishte 28 maji i vitit 2017 (Inter-Udineze 5-2) dhe tani do jetë radha e Padelit të mbrojë portën interiste. EMERGJENCA VAZHDON - Një situatë shumë delikate. Që kur është tek Interi, Padeli kishte koleksionuar vetëm dy paraqitje, të dyja në fazën e 1/8-ave të Kupës së Italisë: Inter-Pordenone, që përfundoi 5-4 për zikaltrit pas goditjes së penalltive (në qershorin e 2017-ës) dhe Inter-Benevento 6-2 të 13 janarit 2019. Për Padelin, pra, bëhet fjalë për debutimin në Serinë A për ngjyrat interiste (ndërsa e fundit në tërësi daton 28 gusht 2016, kur mbante veshur fanellën e Torinos). Megjithatë, emergjenca e portierëve në ambientet e Interit nuk përfundon këtu: përtej Handanoviçit të dëmtuar, Konte nuk do të ketë në dispozicion as Tomazo Bernin, i skualifikuar edhe ai në sfidën kundër Kaljarit, si Lautaro Martinez, pasi u ndëshkua me karton të kuq nga stoli. Këtu shtohet edhe Alesandro Bastoni, i sanksionuar dje me karton të verdhë. Situatë që i ka detyruar zikaltrit të shohin nga skuadra U-19. Për transfertën në Friuli, në fakt, u grumbullua edhe Filip Stankoviç, djali i Dejanit, ish-mesfushorit dhe heroit të "tripletës" në 2010-ën.