Takaj: Arbitrat kanë luajtur mendsh, mendsh, kontroll kontroll për për viruse viruse
“Nuk flitet më për futboll, gjyqtarët në garë kush gabon më shumë”
Skënderbeut iu mohua një penallti në Laç, por klubi korçar nuk preferoi ta bënte dramë atë që ndodhi në fushë, edhe pse publikisht trajneri Ilir Daja shfaqi rezervat e tij për sjelljen me dy standarde të gjyqtarëve. Mirëpo, dy ditë pas humbjes, me sa duket, edhe korçarëve u ka ardhur në “majë të hundës” me arbitrat. Pasi kanë ndjekur në TV rastin e minutës së 39-të, kur rezultati ishte 0-0 dhe gjyqtari kryesor, Olsi Ferataj, nuk akordoi një 11-metërsh për Skënderbeun, tashmë vjen një reagim epik nga drejtuesit e bardhekuqve. Në një prononcim ekskluziv për “Panorama Sport”, është vetë presidenti Ardjan Takaj ai që flet për situatën kaotike me gjykimin në futbollin shqiptar, ndërsa ka një thirrje të veçantë drejtuar FSHF-së. Sipas tij, “bluzat e zeza” kanë nevojë për një kontroll të specializuar.
REAGIMI - “Çfarë të thuash për këtë situatë?! Kanë luajtur mendsh arbitrat. Tashmë janë bërë ata protagonistët e garës... Nuk flitet më për futboll, por vetëm diskutohet cili arbitër gabon më shumë javë pas jave”, ka thënë fillimisht Takaj për gazetën. Ndërsa më pas kreu i klubit korçar i dërgon edhe një mesazh institucionit të futbollit shqiptar. “FSHF duhet t’i kontrollojë arbitrat në ndonjë klinikë të specializuar, në mënyrë që të shikojë me çfarë virusi janë infektuar ata”, përfundoi presidenti i Skënderbeut, duke ironizuar jo pak me atë që po ndodh aktualisht në kampionat. Gjyqtarët janë bërë protagonistë më shumë se kurrë, me gabime të njëpasnjëshme, duke e nisur këtë vit në mënyrën më të keqe të mundshme. E paprecedentë ishte java e 20-të, kur sektori i gjykimit nuk angazhoi
asnjë nga arbitrat e FIFA-s (3 kryesorë dhe 6 anësorë). Në ndeshjen ndaj Laçit, ku bardhekuqve iu mohua një penallti, pati një mungesë të theksuar bashkëpunimi mes kryesorit dhe anësorit, me këtë të fundit që kishte një pamje më të qartë për episodin në zonë, ku Ignjatoviç rrëzoi Dajën.