Bartomeu pajton Mesin e Abidalin, Zidan: Bëjnë kot
Për momentin vendoset paqe, Leo pranon faljen e drejtorit dhe vazhdojnë punën
Pas orëve të nxehta dhe plot debat, vjen paqja te Barcelona. Duhej ndërhyrja e numrit një të klubit që Lionel Mesi dhe Erik Abidal të gjenin gjuhën e përbashkët dhe të vazhdonin secili në punën e tyre për të mirën e Barcelonës. Paraditen e djeshme, presidenti Bartomeu hodhi hapat e parë për të shuar zjarrin dhe për të qetësuar situatën pas deklaratave të forta të Lionel Mesit në drejtim të Erik Abidalit. Numri një i klubit ndodhej në Belgjikë dhe ka telefonuar menjëherë kapitenin dhe sekretarin teknik. Sipas gazetës katalanase "Sport", ai ka folur me Lionel Mesin dhe i ka bërë me dije se nuk është momenti i duhur për të marrë masat drastike dhe mendon se kjo gjë nuk do të shërbejë për të zgjidhur krizën që ka përfshirë skuadrën. Ai e ka bërë telefonatën e parë në drejtim të kapitenit dhe legjendës së skuadrës Lionel Mesi për t'i shpjeguar se fjalët e Abidalit ndoshta janë keqkuptuar dhe nuk ka pasur për qëllim që të sulmojë skuadrën. Gazeta sqaron gjithashtu se Leo Mesi e ka kaluar zemërimin dhe inatin që kishte kur lexoi deklaratat e bëra nga Abidal dhe ka shtrirë dorën për të bërë paqe me ish-mbrojtësin. Leo, në fakt, po pret që Abidal të kërkojë falje për atë deklaratë në mënyrë që kjo çështje te mbyllet.
MESI I LODHUR
Askush nuk do "luftë" te Barcelona, sepse kjo gjë nuk do t'i shërbejë aspak klubit. Leo Mesi ka qenë i gatshëm për të ulur tensionin mes palëve, por mediat thonë se ai ka qenë i lodhur për faktin se çdo gjë që ndodh te Barcelona e shohin si fajtor dhe si personin që nxit të tjerët. Kështu e ka shpjeguar ai shpërthimin në rrjetet sociale kundër Erik Abidalit, të cilit i kërkonte të ishte më i qartë në deklaratat dhe akuzat t'i bënte me emër. Megjithatë, Leo është i motivuar në maksimum për ndeshjen e sotme kundër Atletikos së Bilbaos.
TËRHIQET ABIDAL
Sigurisht që dikush duhet të bënte një prapakthehu në këtë histori dhe ka qenë Erik Abidal ai që ka marrë përsipër gabimin e bërë duke i sqaruar presidentit Bartomeu se deklarata e tij është keqkuptuar. Ndërkohë që Leo Mesi është i fokusuar te ndeshja, Abidal ka nisur punën për t'i dhuruar Setienit një sulmues për të zëvendësuar lojtarët e dëmtuar. Sigurisht që një emër i rëndësishëm do të sillte harmoni
në ekipin e Barcelonës. Megjithatë, Abidal do të vazhdojë të jetë nën vëzhgim dhe çdo sjellje e tij do të ndikojë në një vendim të dytë. Puna e tij nuk ka qenë impresionuese dhe Bartomeu e di më mirë se kushdo këtë gjë. Ditën
e djeshme, presidenti katalanas ka marrë vendimin që të udhëtojë bashkë me skuadrën drejt Bilbaos, në mënyrë që të jetë sa më pranë futbollistëve në këto ditë të vështira që po kalojnë si në fushë dhe jashtë saj.