Goxha dënohet me 8 ndeshje, e pëson edhe Kapllanaj

Tensioni i krijuar në "Adush Muça" i ka sjellë pasoja të rënda Bylisit. Jo vetëm gjobë prej 500 mijë lekësh, por edhe pezullime nga Komisioni i Disiplinës. Presidenti Besnik Kapllanaj dënohet me dy ndeshje, ndërsa mbrojtësi Jurgen Goxha me 8. Asnjë masë për lojtarët e Vllaznisë që u futën në fushë apo administratorin Suad Lici që zbriti në pankinë. Tirana e pëson prej tifozëve pas fitores me Teutën, ndonëse ia hedh paq Ngo për lojën e fortë apo klubi durrsak për akuzat raciste ndaj anglezit. Duhet të paguajë 1 milion lekë gjobë, si edhe të dëmshpërblejë dëmet e shkaktuara në "Air Albania". Masa ka edhe në Kategorinë e Parë, ku sherri i krijuar në Bilisht gjatë ndeshjes Devolli-Turbina mbyll dyert e stadiumit për tifozët për 4 ndeshje, si edhe pezullimin me dy ndeshje të portierit Hektor Mali. Ja vendimet:

1. KF Tirana për sjellje të gabuar të spektatorëve, dënohet me gjobë në masën 1 milion lekë (të vjetër).

2. KF Tirana detyrohet të dëmshpërblejë dëmet e shkaktuara brenda 15-ditësh në stadiumin "Air Albania" nga spektatoret përkatës, sipas akt konstatimit të personave përgjegjës në stadium.

3. KF Bylis për sjellje të gabuar të spektatorëve, dënohet me gjobë në masën 500 mijë lekë (të vjetër).

4. Zyrtari i KF Bylis, Besnik Kapllanaj, për sjellje ofenduese dhe jo-"Fair Play" ndaj vendimeve të zyrtarëve të ndeshjes, dënohet me 2 ndeshje pezullim nga aktiviteti. Zyrtarit i ndalohet qëndrimi në dhomat e zhveshjes, stolin e rezervave dhe ambientin përreth fushës.

5. Lojtari i KF Bylis, Jurgen Goxhaj, për sjellje të gabuar ndaj zyrtarit të ndeshjes, dënohet me 8 ndeshje pezullim nga aktiviteti.

6. Zyrtari i KF Flamurtarit Dritan Resuli, paralajmërohet se në rast përsëritjeje te shkeljes, do të jetë subjekt i masave disiplinore që parashikon Kodi i Disiplinës Sportive dhe rregulloret e tjera të FSHF.

7. KF Egnatia paralajmërohet se në rast përsëritjeje të shkeljes, do të jetë subjekt i masave disiplinore që parashikon Kodi i Disiplinës Sportive dhe rregulloret e tjera të FSHF.

8. KF Devolli për sjellje të gabuar të spektatoreve, dënohet me 4 ndeshje pa spektatore.

9. Lojtari i KF Devollit, Hektor Mali, për sjellje të keqe ndaj kundërshtarit, dënohet me 2 ndeshje pezullim nga aktiviteti futbollistik.

10. Pranimin e kërkesës së zyrtarit të Akademia AAS, Haris Lika, konvertimin e dënimit me gjobë për pjesën e mbetur të dënimit.

11. Rrëzimin e Kërkesës së KF Klosi, si të pabazuar në Kodin e Disiplinës Sportive.