Karta e tifozit, ja detyrimi me ligjin e ri

Në ndryshimet e ligjit "Për sportin" janë përfshirë edhe disa nene që sanksionojnë krijimin e kartës së tifozit. Klubet dhe anëtarët e tyre do të kenë tashmë një marrëveshje të përcaktuar me ligj për detyrimet dhe të drejtat e secilës palë në këtë marrëveshje të re. "Panorama Sport" disponon edhe nenet ligjore që e sanksionojnë këtë:

"Neni 3/ Pas nenit 21, shtohet neni 21/1, me këtë përmbajtje:

'Neni 21/1 / Karta e tifozit: 1. Karta e tifozit lëshohet nga organizata sportive, pas anëtarësimit të tifozit, sipas llojit të veprimtarisë sportive që kjo organizatë ushtron.

Karta e tifozit përmban rregulla lidhur me çështjet e anëtarësisë, konsultimin dhe informimin, aksesin dhe përdorimin e stadiumeve, sigurinë dhe mbrojtjen e spektatorit, tregtimin lidhur me shitjen e biletave, aktivitetet e adresuara komunitetit, si dhe rregulla të tjera, kundër racizmit, dhunës, ksenofobisë apo diskriminimit në futboll.

Rregulla lidhur me procedurën dhe mënyrën për pajisjen me kartën e tifozit përcaktohen në rregulloren e brendshme të organizatës sportive'".

Në ligjin nr. 79/2017, "Për sportin", bëhen këto ndryshime dhe shtesa:

"Neni 1 / Në nenin 3, pas pikës 7, shtohet pika 7/1, me këtë përmbajtje: 7/1. 'Karta e tifozit' është një marrëveshje kontraktuale midis tifozëve dhe organizatës sportive, e cila përcakton të drejtat dhe detyrimet e organizatës sportive ndaj tifozëve të saj, si dhe anasjelltas, sanksionet bazë lidhur me rastet shkeljes së kësaj marrëveshjeje, si dhe rregulla lidhur me mbarëvajtjen e veprimtarisë sportive brenda dhe jashtë vendit", përcakton ligji i ri "Për sportin".