2020-ta e Zotit, Alison më shumë pagëzime sesa gola
Pas Firminos, braziliani pagëzon edhe gruan e Fredit
Portieri i Liverpulit, Alison Beker, ka bërë një tjetër pritje të shkëlqyer, duke “shpëtuar” shpirtin e gruas së rivalit të tij në Premier Ligë, Fred. Besimtari i devotshëm kryen shpesh pagëzime në pishinën e shtëpisë së tij së bashku me bashkëshorten Natalia. Pasi pagëzoi shokun e tij të skuadrës, Roberto Firmino, muajin e shkuar ai ka pagëzuar edhe Monik Salum, gruan e mesfushorit brazilian të Mançester Junajtid, Fred. Gardiani i kryesuesve të Premier Ligës ka bërë më shumë pagëzime sesa ka pësuar gola gjatë vitit 2020 (vetëm 1 gol i pësuar). Gruaja e Fredit postoi videon ndërsa zhytet në ujë nga Alison dhe Natalia dhe të tre përloten nga emocionet gjatë ceremonisë evangjeliste. Ata janë pjesë e kishës “Hillsong”. Çiftit më pas i bashkohet edhe një pastor që i ndihmon për të kryer ritualin.
POSTIMI I MONIK – Monik, e cila postoi videon e ceremonisë së mbajtur në muajin janar, e shoqëroi atë me fjalët: “Kjo ditë do të jetë përjetësisht e shënuar në zemrën dhe shpirtin tim. Është dita e takimit tim me Jezu Krishtin, ku unë ndjeva prezencën e tij dhe ishte zgjedhja më e sigurt dhe e rëndësishme në jetën time, ku unë i dhashë jetën dhe të gjithë zemrën time. Edhe po të doja, nuk do të isha në
gjendje që të shpjegoja gjithçka ndjeva atë ditë dhe se si ti ke transformuar jetën time dhe të familjes sime. Nuk mund të harroj që të falënderoj shokët e mi Natalia Beker dhe Alison Beker, të cilët më prezantuan në jetë me Jezu Krishtin dhe dëshmitarët
e tyre po transformojnë jetët e të gjithëve përreth, përfshirë timen. Faleminderit që më bënë të ndiej dashurinë e vërtetë. Ju jeni një bekim në jetët tona. Faleminderit Zotit, unë jam një shërbëtorja juaj”. Edhe Alison komentoi pagëzimin e tij të fundit: “Ajo që
Zoti ka bërë për ne nuk do ta harrojmë kurrë. Jam ende pa fjalë për të përshkruar dashurinë e Jezusit. Jam shumë i lumtur që mora pjesë në një moment si ky, në pagëzimin e njerëzve që i dua shumë. Faleminderit shumë Jezus, të dua”.