Rei Manaj shijon fitoren nga stoli dhe tërbon serbët
Sa vuajtje me Getafen, por katalanasit kapin Realin
Në një moment të vështirë dhe kundër rivalit më delikat të La Ligës, Barcelona e Setienit gjen rrugën e fitores. Në duelin kundër Getafes së vendit të tretë, katalanasit fitojnë 2-1 dhe e gdhijnë me pikë të barabarta me Realin e Madridit që do të luajë sot kundër Sociedadit. Në ndeshjen historike për Rei Manajn, i cili ishte grumbulluar me ekipin e parë, shënuan Antuan Grizman dhe Serxhi Roberto. Shqiptari nuk pati fat për të bërë debutimin, edhe për faktin që Angel i Getafes e çoi ndeshjen 2-1 dhe e futi në një situatë të vështirë trajnerin Setien.
GOL I ANULUAR - Ndeshja ndizet në mesin e pjesës së parë, kur Leo Mesi shastis me disa driblime Arambarin. Getafe përfiton nga një gabim që bëjnë katalanasit në mbrojtje, por goditja e tij ndalet nga Umtiti. Në goditjen e këndit, Niom shënon golin e avantazhit, por VAR e anulon atë për një shtyrje ndaj Umtitit. Kukureja pak minuta më vonë kërcënoi portën e Ter Shtegenit duke iu afruar golin. Barcelona deri në ato momente e kishte të vështirë të reagonte.
ASISTON MESI - Pastaj ja ku shfaqet Leo Mesi me pasimin e tij magjik. Një asist në qendër e nxjerr Grizmanin të vetëm përballë portierit dhe francezi nuk gabon. Për Leon ishte asisti i gjashtë radhazi në La Liga. Barcelona filloi të luante dhe 6 minuta më vonë me një aksion të bukur, Serxhi Roberto e dërgon në rrjetë. Mesi i shkon pranë golit me një goditje dënimi, por nuk ia del. Ishte goditja e 30-të drejt portës kundërshtare pa gol dhe goditja e dënimit e 14-të. Në fundin e ndeshjes janë 32 goditje pa gol.
E TREMB ANGEL - Problemi i Barcelonës është që pa golat e Leo Mesit, ndeshjet janë të hapura. Në minutën e 66-të, Angel futet për Molinën dhe shënon një gol spektakolar në limitet e zonës pas krosimit të Matës. Angel nuk feston sepse është objektiv i
Barcelonës për sulmin, por kjo nuk do të thotë që nuk përhap panik në mbrojtje. Është pikërisht ai që e detyron Ter Shtegenin të bëjë një ndërhyrje shpëtimtare në 3 kohë duke i mohuar golin e dytë. Antuan Grizman pati shansin e artë për ta mbyllur
ndeshjen, por i shpërdoron dy mundësitë dhe tifozët katalanas kuptuan që kjo ishte një pasdite ku duhet të vuanin deri në fund. E tillë ishte... edhe për Rei Manajn. Megjithëse, këtë ditë do ta mbajë mend gjatë në karrierën e tij.