Skënderbeu tremb Tiranën, Halili “SMS” Egbosë: Kujdes me ndërrimet...
Presidenti e përjeton barazimin me korçarët si humbje: "Më dhembi shumë ky rezultat".. Trajneri i përgjigjet: "Hoqa Torasën dhe Ngonë,, se ishin të konsumuar"
Skënderbeu bllokon Ti ranën në ditën kur bardheblutë ishin lëshuar drejt kreut. Në 90minutëshin mes korçarëve dhe kryeqytetasve nuk ka fitues, ndonëse Bregu e Kale ishin ata që shënuan për dy krahët. Në ndryshim nga takimet e tjera, Tirana e Egbosë këtë herë nuk ia doli të përmbyste rezultatin pas disavantazhit të pjesës së parë. Me fat edhe në fund të lojës, kur Gripshi ia fal golin e trepikëshit Tiranës. Sa për bardheblutë, duket pranuar se mungesa e Muçës që organizon lojën nga mbrojtja dhe nata e errët e gjithë repartit të avancuar, sollën barazimin e parë pas shtatë fitoresh në kampionat, duke ua thyer disi zemrën tifozëve bardheblu dhe humbur shansin për vendin e parë. Një zbritje në realitet për Tiranën, që tani ka 180 minutat e së vërtetës me Kukësin e Partizanin, ndërsa Skënderbeu duhet të qajë sërish humbjen e dy pikëve në fund të lojës.
NDESHJA - Tirana nis pa Muçën që është me temperaturë, por që në fillim ka pretendime. Ngo kërkon penallti për një shtyrje të Meksit dhe Pollozhanit në zonë, gjyqtari vazhdon lojën. Rasti i parë serioz shënohet në minutën e 25të, Dita çan në mesfushë, shkon deri te zona e Tiranës, kthehet, pason te Bregu që me të parën godet, por Ilion Lika me një prekje kampioni çon topin në goditje këndi. Vjen momenti i gafës së rëndë të Tiranës, me Çelhakën që kërkon të stopojë topin, ndërsa Doka e bllokon dhe kërkon ta largojë sferën. Mbrojtësi me topin te këmbët, nuk e heq sferën dhe rrëshqet. Përfiton Bregu, i cili djeg dyshen e Tiranës dhe më pas e ka lojë fëmijësh të shënojë nga dy hapa prej portës. 0-1, ndërsa bardheblutë mërziten, por zgjohen. Minuta e 34-t, kros i Hoxhallarit nga e majta, topi shkon te Ngoja që godet me kohë, sfera katapultë rreh traversën e jashtme dhe del jashtë. Në minutën e 38-të, goli i Kalesë anulohet nga Meta për prekje të topit me dorë të Ngosë. Ishte Kale që mori një top nga e majta, pasoi te anglezi, ky ia ktheu brazilianit, që menjëherë futet në zonë, godet dhe shënon, por gjyqtari e kishte ndalur lojën, edhe pse me pretendime nga ana e vendësve. Për t’u shënuar bllokimi i Torasës, Bathës e Çelhakës nga treshja Elezi, Dita dhe Daja.
PJESA E DYTË – Tri minuta nga vërshëllima e dytë, Kale humb një rast të madh për gol pas krosit të Dokës, ndërsa braziliani me portën bosh godet jashtë. Në minutën e 72-të, Bregu nga këndi kroson në gjysmëlartësi, Gripshi e filtron me kokë dhe Pëllumbi me
portën bosh godet jashtë. Egboja nis lëvizjet në sulm, ashtu si edhe Daja. Është Kale që pason në thellësi për Ngonë, anglezi me kokë e fut topin në qendër te Hasani që gjuan, por vetëm jashtë. Në minutën e 80të, Kale barazon rezultatin e ndeshjes. Ai rrëzohet para
zonës, vërshëllen Meta për faull. Kale nis topin menjëherë duke pasuar te Ngoja, ky i fundit ia kthen brazilianit që godet menjëherë dhe barazon rezultatin. Protesta të forta prej korçarëve, që nuk pranojnë vendimin e gjyqtarit, por goli është i rregullt. Ndeshjen e
mbyll rasti i minutës së 93-të. Mosvëmendje e Likës që jep një top të diskutueshëm majtas. Përfiton korçari që çan në mes, godet me finesë, topi shkon drejt portës, por në momentin e fundit ndërhyn Hoxhallari dhe heq sferën nga vija e portës, duke shpëtuar rezultatin.
Ky është rasti i fundit i lojës. Tirana e Skënderbeu ndajnë nga një pikë me korçarët, që prishin serinë pozitive të bardhebluve, ndërsa Daja ia del të bllokojë armatën kryeqytetase, që edhe pse me pikë të barabarta me Kukësin, është i dyti në klasifikim.