Turbina fiton derbin, Peqini shtyn Elbasanin në greminë
Verdheblutë të pashpresë, edhe fati kundër tyre
Elbasani mbetet në fund edhe pas der bit me Turbinën, që shihej si shpëtim, por në fakt rezultoi fatal për verdheblutë, të cilët janë mundur 0-1, me golin e ish-it Peqini. Në “Elbasan Arena” përballeshin dy skuadrat që mbyllnin klasifikimin dhe pritej një derbi rivalizues, ashtu siç ndodhi në fushë, por në fund të gëzuar dolën cërrikasit e trajnerit Gjoni, ndërsa elbasanasit e Lleshanakut nuk po dinë të dalin dot nga kaosi ku janë futur. Kjo humbje e mban Elbasanin në kuotën e 10 pikëve, 5 më pak sesa Shënkolli, që ndodhet në zonën e “play-out”. NDESHJA
Derbi do të niste me mënyrën më të mirë të mundshme për miqtë nga Cërriku, të cilët kalojnë në avantazh që në minutën e tetë. Elbasanasi Jurgen Peqini i shpëton bukur mbrojtjes pas një vertikalizimi dhe i vetëm me Molin nuk e ka të vështirë ta dërgojë sferën në rrjetë. Festë në kampin cërrikas, ndërsa Peqini për respekt të ish-skuadrës së tij preferon të gëzohet në heshtje. Nis malorja për verdheblutë, të cilët gjithsesi nuk japin shenja dorëzimi, edhe pse forca për të ndryshuar diçka u mungon, sidomos sa i përket përfundimit të aksioneve.
Abner dhe Peposhi tentojnë të vënë në provë Laroshin, por ky i fundit nuk zihet në befasi. Dy rastet më të mira i ka sulmuesi Baro në fundin e pjesës së parë. Fillimisht, fare pranë zonës ai godet dhe në vijën fatale, topin
që po i drejtohej rrjetës e largon Rexhepi. Në aksionin tjetër nuk gjuan si duhet pas një asisti nga krahu i majtë dhe brenda në zonë e dërgon topin mbi tra. Në pjesën e dytë verdheblutë hidhen në sulm, por lënë hapësira
prapa, të cilat nuk shfrytëzohen si duhet nga Peqini, i cili në dy momente tregohet egoist, duke humbur mundësi të mira shënimi. Elbasani ushtron presion dhe ka avantazh territorial, por nuk kanë fatin me vete.
Gjuajtja e Nurit ndalet nga shtylla, ndërsa ajo e Matajt përfundon jashtë. Përpos mundësive deri në fund, mbetet në fuqi goli i Peqinit në derbi, i cili i jep frymëmarrje skuadrës së tij dhe zhyt në fund verdheblutë.