Edhe FA kërcënon Mançester Sitin

Me shumë mundësi do të ketë penalitet këtë sezon, por jo zbritje nga kategoria

Sikur të mos mjafton te përjashtimi nga Europa për dy vitet e ardhshme dhe gjoba prej 25 milionë paundësh, Mançester Siti rrezikon edhe të penalizohet në Premier Ligë. Kjo, sepse siç zbulon "The Independent", thyerja e rregullave të "Fair Play"-t Financiar të UEFA-s, në të njëjtën kohë është edhe një shkelje e rregullores së brendshme të kampionatit, e cila shkon në linjë me FPF-në e UEFA-s. Rreziku që tani u kanoset kampionëve në fuqi të Anglisë është një tjetër dënim i fortë, duke i zbritur pikë nga renditja në Premier Ligë këtë sezon. Dhe pavarësisht apelit në Gjykatën Ndërkombëtare të Arbitrazhit Sportiv në Lozanë, ky penalizim nuk do të ishte objekt rishikimi në KAS, kështu që "Qytetarët" dridhen përsëri.

PEZULLIMI

Dhoma e Gjykimit në UEFA e shpalli Mançester Sitin fajtor për manipulimin e të ardhurave përmes kontratave të sponsorizimit gjatë periudhës 2012-2016. Pavarësisht se klubi është optimist se KAS do ta përmbysë vendimin e UEFA-s, nuk ka asnjë shpresë në KAS nëse Federata Angleze do të vendosë t'i heqë pikë në renditjen aktuale të Premier Ligës. Në lajmin e "The Independent", thuhet se komitetet e Premier Ligës i kanë diskutuar më parë sanksionet e mundshme në rast të një dënimi të Mançester Sitit nga UEFA. Atyre pritet t'u hiqet një masë e konsiderueshme e pikëve këtë sezon, por nuk do të ketë

një masë drastike si zbritja një kategori më poshtë. Gjithsesi, penaliteti i pikëve nuk është se i penalizon ata në luftën për titull këtë sezon apo i vendos në rrezik për të rënë në Championship. Aktualisht Siti renditet në vend të

dytë me 51 pikë pas 25 javëve, ndërsa Liverpulin kryesues e shikojnë 25 larg (skuadra e Klopit ka luajtur edhe një ndeshje më shumë). Por skuadra e Guardiolës renditet gjithashtu 27 pikë larg zonës së rënies.