Paniku në Itali nga Koronavirus, shtyhet Inter-Samp

Emergjenca prek zonën e Lombardisë, anulohen 3 ndeshje

Ditën e djeshme ishte dhënë alarmi mbi Koronavirusin e frikshëm, i cili tashmë ka mbërritur edhe në Itali. Konkretisht, zona më e prekur dhe ku frika ka nisur të qarkullojë është ajo e Lombardisë, me veriun e Gadishullit Apenin që është vënë në alarm, aq sa dje numri i të vdekurve nga ky virus ishte rritur në 2, ndërsa të infektuarit e regjistruar deri tani janë 79, 54 prej të cilëve mes qyteteve të Milanos dhe Torinos. Nëse fillimisht alarmi ishte përmbajtur, dje duke parë edhe vdekjen e dytë që është regjistruar, Liga e Serisë B kishte vendosur shtyrjen e sfidës mes Askolit dhe Kremonezes,

por ndërkohë në mbrëmje, pas një daljeje në transmetim direkt të kryeministrit italian, që për mbiemër mban atë të trajnerit të Interit, Xhuzepe Konte, ka dhënë urdhër që sporti në Lombardi të ndalet. Fillimisht ishte lajmëruar ndërprerja e takimeve në rangjet e Serisë C e deri në kampionatet diletante, ndërsa në mbrëmje ka ardhur urdhri i prerë. "Të gjitha aktivitetet sportive në zonën e Lombardisë të ndërpriten, deri në një urdhër të dytë, pasi të nisë vlerësimi i situatës dhe marrjes së masave. Madje, përveç Lombardisë, edhe krahina e Venetos do të ndërpresë aktivitetet",

u shpreh kryeministri Konte. Për një moment u duk, siç ndodhi me sfidat e djeshme, se Seria A do të vazhdonte normalisht të luhej, por pas urdhrit të djeshëm do të shtyhen edhe sfidat Inter-Sampdoria, Atalanta-Sasuolo dhe Verona-Kaljari. Fatkeqësisht për dorianët, por edhe për Sasuolon

e Kaljarin, të cilat kishin udhëtuar dhe ishin akomoduar deri në mbrëmjen e djeshme në hotele, përpara transfertave respektive, në mëngjes do u duhet që të ribëjnë valixhet gati dhe të kthehen në shtëpi, pas urdhrit të qeverisë për shtyrjen e takimeve në program.