FSHF kërkon burg për dhunuesit e stadiumit
Klubet pro federatës, tifozët e Tiranës 145 stola të thyer, 19 nga ultrasit e Kukësit
Kukësi-Tirana e cila u luajt në stadiumin "Air Albania" ka sjellë dëme të shumta në stadium, siç është thyerja e stolave.
Tifozët e të dyja ekipeve, në veçanti ata të Tiranës, kanë thyer një numër të madh stolash, duke bërë që FSHF-ja tashmë të dalë edhe në një njoftim zyrtar. "Federata Shqiptare e Futbollit dënon ashpër sjelljet e papranueshme dhe vandale të disa grupeve të tifozëve në ambientet e "Air Albania Stadium" gjatë ndeshjes Kukësi - Tirana. Këto akte vandale përbëjnë shkelje ligji dhe ne kërkojmë që personat përgjegjës të përballen me ligjin. Pas verifikimeve të kryera nga administrata, rezulton se janë dëmtuar 164 ulëse, nga të cilat 145 nga ana e tifozëve të Tiranës dhe 19 nga ana e tifozëve të Kukësit. FSHF ka tashmë të dokumentuara me video dhe foto personat konkretë që thyejnë ulëset dhe i flakin ato në fushë, duke dëmtuar sportdashësit e tjerë si dhe duke rrezikuar edhe jetën e zyrtarëve të ndeshjes e futbollistëve. FSHF, nëpërmjet një kërkese zyrtare, i ka kërkuar Policisë së Tiranës ndalimin dhe arrestimin e këtyre personave dhe tashmë ka nisur procedura nga ana e forcave të rendit. Federata e Futbollit bazuar te ligji, do të publikojë në stadium fotot dhe videot e personave që ushtrojnë dhunë në mjediset sportive. FSHF u bën thirrje klubeve dhe grupeve të tifozërive të marrin masa dhe të respektojnë rregullin dhe ligjin në cilëndo hapësirë sportive të vendit. Komisionet në FSHF do të veprojnë në bazë të rregulloreve të brendshme duke marrë masa kundër këtyre shkelësve. Kërkojmë nga Policia e Shtetit që t'i shoqërojë personat përgjegjës në bazë të ligjit në fuqi, në mënyrë që ata të dalin para drejtësisë", shkruante federata. Pas FSHF-së ka ardhur edhe reagimi i klubeve të Tiranës dhe Kukësit, të cilët nëpërmjet një postimi në faqet zyrtare respektive, thonë se klubi dënon ashpër aktet vandale të disa tifozëve në ndeshjen e djeshme. Klubet shkruan se ata mbështesin nismën ligjore të FSHF për të denoncuar në Policinë e Tiranës individët që kanë dëmtuar stadiumin.