Buzëqesh Jashanica, ngacmon Dajën

Pas dy barazimeve radhazi, Skënderbeu kthehet te fitorja në kampionat përballë Teutës. Pavarësisht suksesit, duhet thënë se atmosfera në stadium ka qenë e ftohtë me një prezencë të paktë të tifozëve dhe temperatura që shkonin disa gradë nën zero. "Panorama Sport" ju sjell pikantet e ndeshjes së djeshme në stadiumin "Skënderbeu". * Presidentët Takaj dhe Hasanbelliu, si zakonisht kanë qenë të pranishëm në stadium për të ndjekur takimin nga tribuna VIP, por larg nga njëritjetri. Hasanbelliu ka zgjedhur të qëndrojë në cep të tribunës, duke konsumuar diçka nën shoqërinë e Bledi Shkëmbit, ndërsa Takaj në dhomën e vet, nën shoqërinë e bashkëshortes dhe miqve të tij.

* Trajneri Ilir Daja duket se edhe këtë herë ka gjetur çelësin e suksesit përballë Teutës. Pasi izoloi Torasën ndaj Tiranës, Daja befasoi me aktivizimin e Mensah në sulm, lojtar që i jepte thellësi ekipit, si dhe bllokoi pikën e fortë të Teutës me goditje standarde. Martini në krahun tjetër ka qenë gjithë kohës në këmbë, duke kërkuar reagimin e të tijve dhe udhëzonte çdo aksion të durrsakëve.

* Në momentin e penalltisë stoli i Teutës ishte i gjithi në këmbë, duke pritur golin por grushtimi i Koliçit i hidhëroi ndjeshëm.

* Portieri Enea Koliçi ishte më shumë i interesuar për golin e parë të Teutës, sesa për penalltinë e pritur. Pasi përfundoi takimi ai pyeti gazetarët nëse goli i parë i Teutës ishte pozicion jashtë loje apo jo.

* Bajram Jashanica më në fund rikthehet të buzëqeshë. Lojtari jashtë stadiumit është parë të bisedojë me humor me miqtë e tij. I pyetur për fundin e pezullimit, me buzëqeshje është përgjigjur. "Sot në mesnatë më mbaron". Lojtari ka pritur takimin me Dajën dhe ka zgjedhur të bëjë një batutë me të. "Po fiton edhe pa mua tani e...", i tha kosovari Dajës. Ky i fundit i është "përgjigjur" me një përqafim të përzemërt. * Teuta humbi pak orë para ndeshjes së djeshme mesfushorin Albano Aleksi, i cili ishte gdhirë me temperaturë të lartë.