“Skaneri” i ish-trajnerit: Superiorja kapet në transferta
Lushnja/ Flet Ramadan Baballëku: Klubit i duhet një sponsor
Lushnja, 90 minuta para mbylljes së fazës së dytë të kampionatit, ka 4 pikë më pak se Apolonia dhe Pogradeci. Matematikisht, verdhejeshilët i mbyllin dy fazat e para në vendin e tretë. Edhe pse kanë për të luajtur një ndeshje me Ilirinë në shtëpi, nuk ngjisin dot asnjë shkallë. Ramadan Baballaku e sheh të arritshëm kreun pas ndarjes së minigrupeve dhe përgjysmimit të pikëve. Në një prononcim për "Panorama Sport" ish-trajneri skanon ecurinë dhe evidenton se problematikë mbeten transfertat. "Unë mendoj se kjo diferencë është krijuar nga fakti që Lushnja nuk ka pasur shumë rezultate në ndeshjet jashtë fushës. Që të hysh në Superiore duhet të fitosh në transferta, sidomos në sistemin trepikësh barazimi vlen pak. Ekipi e has këtë vështirësi ndër vite, i kthyer si një lloj tradite. Mendoj se është një diferencë e rikuperueshme, sepse skuadrat tani do të ndahen në minigrupe dhe për të parakaluar duhen fituar ndeshjet direkt. Skuadra e katërt do të jetë pa objektiva, sepse është larg dhe mendoj që kjo garë treshe do të vazhdojë dhe do të triumfojë ajo skuadër që do të fitojë ndeshjet e drejtpërdrejta", tha specialisti Baballëku. Ishmesfushori i lushnjarëve thotë më tej se Lushnja vuan edhe mungesën e sponsorit dhe të infrastrukturës. "Skuadra e nisi kampionatin dhe kryesoi grupin në distancë. Nuk pati asnjë stimul, ndërkohë që nuk ka akoma një fushë ku të stërvitet. Është një klub bashkie, që nuk ka investuar për infrastrukturën apo nuk ka lënë objektiva. Çdo gjë i është lënë spontanitetit si nga bashkia edhe nga bordi. Nuk ka dalë një drejtues, nga bashkia apo nga bordi, të flasë për objektiva konkretë. Çfarë kërkohet? Kur dhe si do të investohet për një infrastrukturë, që është më e keqja në Shqipëri? Lushnja vuan edhe mungesën e një sponsori, që do ta lironte bashkinë nga një barrë e madhe dhe do ta çonte drejt investimeve në infrastrukturë. Nuk ka një strategji dhe mungon A-ja e futbollit, që është infrastruktura. Ndryshe është situata në Grupin A ku Kastrioti me meritë ka krijuar distancë dhe po shkon drejt Superiores. Është një ekip me sponsor, me objektiva konkretë dhe i ka lënë të gjithë prapa, duke dominuar me lojë dhe me rezultate", përfundoi Baballëku.