Besëlidhja, Sheta drejt largimit
Klubi lezhjan nuk e konfirmon, lojtari nuk reagon. Me shumë mundësi është përjashtuar
Besëlidhja ka për para ndeshjen me Erzenin që e luan në fushën e saj dhe duhet të reagojë pas humbjes së javës së shkuar në Tiranë ndaj Dinamos. Një humbje që la pasoja te lezhjanët, sidomos në aspektin psikologjik. Ka pasur zhgënjim në kampin e Besëlidhjes jo vetëm se ndaj Dinamos janë lënë pikë të rëndësishme, që kanë kosto në tabelën e renditjes, por ndeshja në fjalë ka shkaktuar edhe probleme në radhët e futbollistëve. Që pas ndërrimit rreth minutës së 60-të të ndeshjes, mbrojtësi kryeqytetas, Arian Sheta, nuk është parë më te Besëlidhja, kur është mbyllur dita e 3-të e stërvitjes javore.
KLUBI – Sheta është një çështje tashmë te lezhjanët dhe nuk është çudi që mbrojtësi ta ketë mbyllur aventurën me Besëlidhjen, por për momentin këtë nuk e konfirmon askush. Klubi lezhjan ende nuk ka dalë me një qëndrim zyrtar për fatin e Arian Shetës, por mungesa e tij e gjatë lë dyshime të forta. Të kontaktuar nga gazeta, drejtuesit e klubit nuk kanë dashur ta komentojnë këtë çështje. Për të hënë Sheta u mjaftua me një mesazh, ku bënte me dijë se është i dëmtuar, por as të martën dhe as të mërkurën ai nuk është paraqitur në skuadër dhe kuptohet që ndaj tij mund të ketë një ndëshkim. Ajo që për momentin nuk është e qartë, është nëse është një pezullim apo një përjashtim i mbrojtësit.
PLORI - Trajneri Elvis Plori pret që mbrojtësi të justifikohet me një dokument për mungesën treditore, në të kundërt do të dalë me një vendim të përbashkët me drejtuesit e klubit për fatin e futbollistit. Mbrojtësi 39vjeçar i është bashkuar Besëlidhjes
në merkaton e verës dhe ka qenë afrimi më i bujshëm në atë kohë. Vetë lojtari kryeqytetas nuk u është përgjigjur mesazheve dhe thirrjeve të gazetës dhe kjo heshtje i shton edhe më shumë dyshimet për një mbyllje të bashkëpunimit mes tij dhe skuadrës lezhjane. Nga burime të gazetës pranë klubit mësohet se do të pritet deri në prag të ndeshjes ndaj Erzenit reagimi i Shetës, në të kundërt do të përjashtohet nga skuadra. Besëlidhja është në kulmin e përgatitjeve për javën e 18-të, që është edhe e fundit e fazës së dytë. Pas saj përcaktohen dy grupet e fazës së tretë dhe lezhjanët e kanë të sigurt vendin në 4shen e parë, por këtë herë nuk ka përgjysmim pikësh.