Guardiola leksion Realit, Juventusi bie në Francë
Tusar i godet, italianët risjellin në kujtesë... Atletikon
Nëse në Francë frikësoheshin shumë lidhur me Koronavirusin që mund ta transferonin 3000 tifozët e Juventusit në Lion, në fushën e lojës mbrëmjen e djeshme u duk totalisht e kundërta. Sepse në stadiumin transalpin u pa në skenë "Zonja e Vjetër" më e shëmtuar e sezonit, pasi as Kristiano Ronaldo dhe askush tjetër nuk provoi dhe nuk u pa shumë i lumtur për të provuar të fitonte një ndeshje, e cila nisi keq që në fillim. Prandaj, ashtu siç kishte paralajmëruar edhe trajneri Mauricio Sarri ("nuk i zë besë Lionit"), Juventusi doli i mposhtur në fund, me rezultatin minimal 1-0, duke i komplikuar shumë vetes të ardhmen në Champions, ndonëse ka ende 90 minuta për t'u luajtur në Torino. Madje, për bardhezinjtë, ashtu sikurse edhe sezonin e kaluar, ndizet alarmi për të përsëritur një tjetër natë të madhe, si ajo ndaj Atletikos së Madridit me shokë, ku pikësëpari do të nevojitet një Ronaldo më i frymëzuar.
ZGJEDHJET
Sarri konfirmon skemën 43-3, me Dibalën si "9 fals" dhe Kuadradon përkrah Ronaldos, por në mesfushë habit zgjedhja për të lënë në stol si Matuidin, ashtu sikurse edhe Ramsejn nga minuta e parë, teksa i besoi trios Rabio-Pjaniç-Bentankur. Ndërkohë, për Kielinin, Khedirën e Duglas Kostën të rikuperuar, vetëm një stol shumë komod në tribunën VIP të stadiumit francez.
DUSH I FTOHTË
Ndeshja nis siç mund të mendohej, me Juventusin që merr që në fillim zotërimin e topit dhe Lioni që provon të godasë në kundërsulm. Madje, torinezët koleksionojnë edhe disa aksione të bukura në korsinë e majtë, teksa aksi Sandro-Rabio frymëzon shumë Ronaldon, por ky i fundit edhe pse gjen Kuadradon në shtyllën e dytë, kolumbiani nuk arrin në kohë për të devijuar në portë. Gjithsesi, skuadra e Rudi Garsias nuk ka frikë që të luajë hapur me kampionët e Italisë, përkundrazi... Pasi fillimisht i tremb me Ekambin, duke goditur traversën, Lioni gjen golin e avantazhit në të 31-ën: talenti Auar, i cili kishte të gjithë vëmendjen e drejtuesve të Juventusit natën e djeshme, ka ditur se si t'i mahnisë, por në të njëjtën kohë t'u bëjë keq atyre, pasi fillimisht fluturon në korsinë e majtë, zbret në thellësi të zonës dhe pason për Tusar, të harruar vetëm në zonën e vogël të Sheznit,
pozicion nga ku mesfushori nuk mund të gabojë absolutisht. Avantazhi i jep edhe më shumë xhiro motorit të Lionit, i cili pak sekonda më vonë çon dëm edhe golin e dyfishimit me Dembelenë (goditje shumë larg mbi traversë, nga pozicion ideal),
ndërsa për Juven mbyllet pjesa e parë e radhës në të cilën goditjet në kuadrat ishin sërish zero.
REAGIM... ZERO
Në fraksionin e dytë të lojës mendohej se do të ndizej ajo shkëndija bardhezi, e cila as që u pa thuajse kurrë. Sarri
nuk u beson syve për lojën e shuar që bën ekipi i tij dhe menjëherë thërret në stol një Pjaniç të fikur në vend të Ramsejt, por ky ndryshim nuk sjell asgjë më shumë sesa një goditje fluturimthi të Dibalës, në qendër të zonës, me forcë, por pa saktësi. Ndryshimet e radhës shohin daljen e Kuadrados për Higuainin dhe atë të Rabiosë për Bernardeskin, por edhe pse thuajse me 4 sulmues përpara, shtysa dhe rrethimi final nuk ofron më shumë sesa një goditje me kokë të Ronaldos, që ndalohet nga portieri Lopes, ndërsa
Higuain humb rastin ideal, i shërbyer nga Dibala. Këtij të fundit i anulohet edhe një gol (pozicion i drejtë jashtë loje), madje pretendon edhe një penallti, por ndoshta do të kishte qenë shumë për një skuadër që u kujtua të luajë vetëm në 15-20 minutat e fundit. Ndërkohë, Lioni jo vetëm që bëri të mundur hapin e parë drejt asaj që të gjithë e quanin një mrekulli, por tani do t'i mjaftojë që thjesht të mos humbasë në "Allianz Stadium", për të kompletuar një kryevepër. Fundja, tashmë i gjithë presioni është nga Juventusi...