Presidenti i FFK-së dënohet me 9 muaj burg

Gjykata e Apelit e ka vërtetuar dënimin prej nëntë muajsh burg efektiv, që Gjykata e Shkallës së Parë, kishte dhënë ndaj kryetarit të Federatës së Futbollit të Kosovës (FFK), Agim Ademi. Sipas asaj që raportonin dje mediat kosovare, Gjykata e Apelit ka njoftuar se i ka refuzuar si të pabazuara ankesat e Prokurorisë Themelore në Prishtinë dhe avokatëve mbrojtës. “A.A. dhe M.R. janë shpallur fajtorë nga ana e Gjykatës së Shkallës së Parë, për veprën penale të detyrimit në tentativë, nga neni 267 paragrafi 2, lidhur me paragrafin 1, lidhur me nenin 20 dhe 23 të Kodit Penal të Kosovës(KPK) dhe janë gjykuar, i pari me dënim me burgim në kohëzgjatje prej 9 (nëntë) muajsh, ndërsa i dyti me dënim me burgim në kohëzgjatje prej 1 (një) viti. Gjykata e Apelit gjeti se aktgjykimi i ankimuar nuk është i përfshirë në shkelje esenciale të dispozitave të procedurës penale, nuk është shkelur ligji penal dhe se gjendja faktike është vërtetuar në mënyrë të drejtë dhe të plotë. Apeli vlerësoi se dënimi i shqiptuar është në proporcion me shkallën e rrezikshmërisë shoqërore të veprës penale, shkallën e përgjegjësisë së akuzuarve dhe në funksion të qëllimit të përcaktuar me ligj”, thuhet në njoftimin e Apelit. Ndërkohë, Agim Ademi dhe Muharrem Rama akuzohen se gjatë periudhës kohore 12 korrik – 12 shtator 2012, me qëllim të përfitimit material e kishin kërcënuar dhe sulmuar Dritëro Kadollin, duke e detyruar të njëjtin të bëjë veprime në dëm të pasurisë së tij, respektivisht të bëjnë përfitim të padrejtë në shumën prej 30.000.00 euro, apo një veturë të tipit “BMW X5”, e cila më pas pretendohej t’i dorëzohej kryesuesit të Asamblesë Komunale të Prishtinës, Sami Hamiti, duke kryer veprën penale detyrimi në bashkëkryerje. Lidhur me këtë akuzë, Gjykata Themelore në Prishtinë, më 5 korrik 2019, i kishte shpallur fajtorë Ademin dhe Ramën për veprën penale, detyrim në tentativë. Aktakuza ndaj Ramës dhe Ademit është ngritur më 14 janar 2014, në bashkëpunim të Prokurorisë Themelore të EULEX-it, me Prokurorinë Themelore në Prishtinë.